iklan

JUSTISA, HEADLINE

Naimori presta deklarasaun iha Ministériu Públiku tanba envolve krime intervensaun

Naimori presta deklarasaun iha Ministériu Públiku tanba envolve krime intervensaun

Konselleiru Másimu Partidu KHUNTO, José dos Santos Naimori Bucar. Imajen Tatoli/Egas Cristovão

DILI, 10 jullu 2024 (TATOLI) – Konselleiru másimu Partidu Kmanek Haburas Unidade Nasionál Timor Oan (KHUNTO), José dos Santos Naimori Bucar, presta deklarasaun iha Ministériu Públiku, ba krime intervensaun ba autoridade públika ne’ebé previstu iha artigu 242 husi Kódigu Penál Timor-Leste.

“Ohin ha’u mai iha Ministériu Públiku atu presta deklarasaun ba kazu kona-ba aeroportu nian. Buat hothotu los ona, di’ak depois Tribunál mak aban bainrua mak sei fó julgamentu”, Naimori Bucar hateten ba jornalista sira hafoin presta deklarasaun iha edifísiu Prokuradór Jerál Repúblika, kuarta ne’e.

Naimori hateten, hanesan sidadaun prontu kontribui ba justisa, tenke koopera, atu buat hotu tenke tuir lei.

“Buat hotu ita hotu hanesan sidadaun koopera ho lei para buat hotu bele lao ho di’ak. Ida-ne’e mak dever nudar povu Timor-Leste, hanesan sidadaun ne’e tenke hatene saida mak lei. Ita hotu iha lei nia okos ne’ebé tenke kumpre ba desizaun”, nia afirma.

Rekorda fali katak kazu ne’e akontese iha loron 7/10/2022 bainhira membru husi partidu KHUNTO lori osan ho montante 130.000 atu hola atributu, bainhira to’o iha aeroportu, ekipa konjunta hosi Servisu Nasionál Intelijénsia (SNI) PCIC deteta no halo kedan apreensaun ba osan sira ne’e iha momentu ne’ebá.

Tuir lei rejime jurídiku ba prevensaun no  kombate brankamentu kapitál no finansiamentu terorizmu ne’ebé haktuir iha lei númeru 17/2011 ne’ebé públika iha 28 dezembru ho lei númeru 5/2013/III primeiru altersaun ba lei númeru 17/2011, 28 dezembru proibe sidadaun sira lori osan $10.000 ba sai husi aeroportu, kuandu hakarak lori osan ho montante hanesan ne’e antes ne’e tenke informa uluk atutoridade seguransa iha aeroportu molok lori ba rai li’ur.

Autoridade seguransa halo tiha apreensaun ba osan ne’e iha Aeroportu Nicolau Lobato Comoro, hetan intervansaun kedan husi José dos Santos Naimori Bucar. Ho kazu ida-ne’e sai hanesan preokupasaun públiku iha sosiedade.

Jornalista: Natalino Costa     

Editór : Zezito Silva

iklan
iklan

Leave a Reply

iklan
error: Content is protected !!