Top

PNTL detein membru GAR na’in-tolu tanba treinu subar

Logotipu PNTL. Imajen/Espesiál

DILI, 11 jullu 2024 (TATOLI) – Komandu Polísia Timor-Leste (PNTL) Munisípiu Dili detein membru Grupu Arte Marsiál (GAM) Persaudaraan Setia Hati Terate (PSHT) na’in-tolu tanba halo atividade treinu kalan iha área Santa Kruz, Postu Administrativu Nain Feto, Munisípiu Dili.

“Horikalan ita-nia ekipa sekreta sira iha terenu deteta iha grupu arte marsiál husi Persaudaraan Setia Hati Terate, sira halo atividade treinu subar iha área Santa Kruz. Nune’e ekipa sekreta kontatu kedan mai Komandu Dili no ami haruka kedan ita-nia patrollamentu iha terenu no sira haree duni katak membru PSHT na’in-tolu mak halo hela atividade treinu subar iha área Santa Kruz. Nune’e ita-nia ekipa sira asegura suspeitu na’in-tolu ne’e ho flagrante no lori kedan mai Komandu Dili hodi tuir prosesu identifikasaun”, Komandante PNTL Munisípiu Dili Superintendente Xefe Polísia, Orlando Gomes, hateten ba jornalista sira iha nia kna’ar fatin Caicoli, kinta ne’e.

Nia dehan, suspeitu na’in-tolu ne’e, agora dadaun, detein ona iha sela komandu PNTL hodi submete ba oras 72 molok aprezenta iha Tribunál hodi halo Primeiru Interogatóriu no polísia asegura mós evidénsia hanesa atributu organizasaun nian uza hodi treinu.

Orlando hateten, Komandu PNTL Munisípiu Dili kontinua halo operasaun ba grupu arte marsiál no arte rituál ne’ebé hakarak halo atividade treinu subar iha tempu kalan, tanba bazeia ba rezolusaun Governu nia kona-ba atividade arte marsiál no arte ritual, tanba Governu suspende ona atu labele halo atividade ensinu ba arte marsiál tantu arte ritual.

“Kuandu iha membru GAR no GAM mak kontinua halo atividade treinu subar iha tempu kalan, entaun sira ne’e la kumpre ba desizaun Governu nian, idane’e ita konsidera sira ne’e dezobediénsia ba lei no polísia sei atua tuir lei ne’ebé iha ona”, nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!