DILI, 11 jullu 2024 (TATOLI) – Tribunál Judisiál Primeira Instánsia Dili (TJPID), iha kinta (11/7), deside aplika medida koasaun aprezentasaun periódika ba arguidu JS ne’ebé envolve krime arma branka no ofensa integridade fízika simples.
interogatóriu dahuluk, Ministériu Públiku liuhusi Prokuradór Luis Hernani Rangel, promove arguidu JS ho krime arma branka ne’ebé previstu iha lei númeru 5/2017 kona-ba arma branka no ofensa integridade fízika simples ne’ebé previstu iha artigu 145 husi Kódigu Penal Timor-Leste.
Iha prosesu interogatóriu, JS konfensa ba Tribunál katak momentu ne’ebá nia kolega sira hemu tua hamutuk ho kondisaun lanu duni no nia lori duni tudik ida, maibé nia la halo asaun ruma no nein halo agresaun ruma.
Iha alegasaun, Ministériu Públiku husu ba Tribunál aplika medida koasaun aprezentasaun periódika ba arguidu JS, tanba laiha indísiu ruma ne’ebé envolve krime ne’ebé Ministériu Públiku imputa ba nia.
Defeza husi arguidu JS, Defensór Públiku Manuel Sarmento, konsidera desizaun Tribunál ne’e adekuadu.
“Medida koasaun aprezentasaun periódika, ne’ebé liuhosi despaisu ikus Tribunál nian hasai ba ha’u nia kliente ohin ne’e medida ne’ebé mak ha’u konsidera adekuadu duni”, nia afirma.
Antes ne’e, arguidu JS envolve krime arma branka no ofensa integridade fízika simples iha área Kampung Alor, iha loron segunda (8/7) kalan foin lalais ne’e, arguidu JS hemu tua ho nia kolega sira iha Kampun Alor hafoin arguidu ho kondisaun lanu, arguidu lori tudik ida, maibé iha momentu ne’e arguidu nunka halo asaun ruma hodi ameasa ema ruma ba.
Jornalista: Natalino Costa
Editór : Zezito Silva
