DILI, 12 jullu 2024 (TATOLI)– Jogu ba kopa Federasaun Futeból Timor-Leste (FFTL) besik ona ba nia rohan. Iha ne’ebé sei kontra malu entre ekipa rua B2B FC no São José FC iha Estádiu Munisipál Dili, domingu (14/07) loraik.
Rezultadu ne’e hatudu bainhira iha jogu ikus iha semi-finál ne’ebé termina husi B2B vs DIT FC, kinta loraik ne’e, iha Estádiu Munisipál Dili, B2B mak sai nu’udar manán na’in ho sutu penalidade hodi avansa ba finál, nune’e ekipa ne’e tenke kontra São José FC hodi hadau malu se loOs mak sai kampiaun.
Tuir padraun futeból 11 nian bainhira jogu la’o iha kampu laran tenke lidera husi árbitru prinsipál mak Francisco Pereira fó orden ba jogadór sira oinsa bele hala’o jogu tuir regulamentu jogu nian.
Husi oportunidade ne’e, ekipa rua lansa kedan kontra no atake ba malu tuir tékniku no abilidade ekipa idaidak nian ne’ebé haraik ona husi treinadór sira.
B2B halo presaun ne’ebé maka’as hasoru DIT, maibé DIT mós la fó fatin foti asaun ne’ebé rigurozu ho kontra atake oioin. Husi atake malu hirak ne’e hatudu duni ekipa rua nia forsa, nune’e susar ba ekipa ida atu halo lalais golu.
Minutu la’o nafatin ba oin, jogu mós kontinua haka’at ho barullu, kontra no atake nafatin manás liutan, jogu ne’e rame liu bainhira sunu mós husi adeptus atus ba atus ne’ebé tur nakonu iha tribun leten, hakilar ho lian maka’as, hakilar ho lian oioin fó suporta másimu ba sira nia ekipa favoritu.
B2B utiliza meiu hotu hodi halo presaun hasoru DIT, maibé Defeza DIT kontinua firme iha nia pozisaun hodi taka metin avansadu B2B fó impaktu ba B2B seidauk bele prodús golu. Asaun ne’e akontese mós ba defeza B2B nian ne’ebé taka metin avansadu DIT nian halo susar DIT atu prodús golu.
Maibé B2B nunka lakon esperansa, kontinua halo esforsu maka’as, hatudu espíritu jogu, nune’e iha minutu 43 husi minutu 45 primeira parte nian jogadór Carol Araujo (21) konsege lansa bola ho maka’as husi lina liur tama liu ba rede DIT halo guarda rede DIT Aderito Fernandes la antisipa ho di’ak bola tama liu ba laran muda kedan rezultadu ba 1-0.
Golu ne’e halo B2B kontente maka’as hahú jogadór, ofisiál no adeptus sira, idaidak hakilar ho lian maka’as hodi selebra golu ne’ebé akontese ona.
Golu ne’ebé B2B halo hanesan golu ikus iha minutu 45 nia laran, nune’e jogadór sira tenke deskansa ba minutu 45 parte segundu nian.
Dolar ba segunda parte ekipa rua kontinua lansa kontra no atake ne’ebé maka’as ba malu, DIT halo esforsu oioin nune’e labele hatun nia dignidade hanesan klube primeira divizaun iha Liga Futeból Timor-Leste (LFTL).
Esforsu ne’ebé DIT halo la hela de’it hanesan esforsu tanba jogu la’o to’o minutu 47 jogadór Romario Moniz (13) konsege fura duni rede B2B hodi muda rezultadu ba 1-1. Golu ne’e halo DIT nia laran metin fila fali hodi hala’o jogu ho fiar aan.
B2B la nonok kontinua lansa kontra no atake ne’ebé maka’as maibé la konsege ezekuta di’ak iha lina finalidade ikus nunka rezulta tan golu.
DIT mós esforsu atu aumenta tan golu nune’e bele manán jogu ne’e, maibé la konsege tanba B2B iha forsa ne’ebé másimu. Ho forsa jogu ne’ebé la diferente ikus to’o minutu normál jogu nian termina ekipa rua tenke dada malu ba kedan sutu penalidade hodi buka se los mak atu manán jogu ne’e.
Iha sutu penalidade ne’e, ezekuta uluk husi DIT ne’ebé loke husi jogadór João Pedro (10), iha sutu ne’e guarda rede B2B Junildo Pereira (3) konsege salva ikus la rezulta golu. Tuir fali sutu ne’ebé ezekuta husi B2B jogadór Isaac dos Santos (19) fó duni rezultadu di’ak tama liu ba rede laran muda rezultadu ba 1-0.
Iha sutu penalidade ba dala rua husi DIT ezekuta husi jogadór Hilario Ximenes (26) konsege tama duni ba rede laran muda rezultadu ba 1-1, iha sutu B2B nian ba dala rua jogadór Denilson Almeida (10) bola nafatin tama muda rezultadu ba 2-1. Sutu dala tolu DIT nian ezekuta husi jogadór Marcos Barros (12) guarda rede B2B konsege salva halo falla kedan DIT nia rezultadu hodi hela metin nafatin 1-2.
Iha sutu ba dala tolu B2B nian ezekuta husi Celcio Eskurial (16) bola la falla no tama liu ba rede laran muda rezultadu ba 3-1. Sutu dala haat husi DIT nian ezekuta husi Serafim Brito (17) bola tama liu rede laran muda rezultadu ba 3-2. Ikus liu B2B tenke termina sutu husi jogadór Jardel Piedade (24) bola tama liu ba rede laran muda rezultadu ba 4-2 lori kedan B2B sai manán nain iha jogu semi-finál ne’e.
Husi rezultadu jogu ne’e, DIT tenke elemina hodi kompete fali ho Relay FC hodi buka terseiru lugar. Enkuantu B2B avansa ba finál hodi hadau malu ho São José.
Rekorda fali katak, ekipa rua ne’ebé avansa ona ba finál iha jogu apuramentu grupu hamutuk iha gupu D, no sira nia jogu faze apuramentu B2B konsege manán ona São José ho rezultadu 2-1.
Jornalista: Hortencio Sanchez
Editor: Florencio Miranda Ximenes
