Komandu PNTL dezloka membru 40 reforsa seguransa iha fronteira
DILI, 12 jullu 2024 (TATOLI) – Komandu Polísia Nasionál Timor-Leste (PNTL) dezloka membru 40 atu reforsa servisu Unidade Patrollamentu Fronteira (UPF) hodi fó apoiu seguransa iha zona fronteirisa.
Membru PNTL hirak ne’e, balun sei ba troka membru polísia ne’ebé mak antes ne’e komandu koloka iha Unidade Patrollamentu Fronteira iha fulan tolu kotuk.
“Efetivu ne’ebé komandu koloka ne’e atu apoia servisu Unidade Patrollamentu Fronteira hodi reforsa seguransa iha área iha fronteira tanba área fronteira ne’e luan no sira labele kontrola, ita hanesan PNTL, ita prontu atu bele apoia sira iha kualkér tempu tanba ita-nia misaun ida de’it”, Komandante Komandu Operasaun Nasionál, Superintendente Xefe Polísia José Soares, hateten liuhusi komunikadu ne’ebé Agência TATOLI asesu, sesta, ohin.
Nia dehan, membru polísia 40, sei ezekuta servisu liuhusi orientasaun Komandu Unidade Patrollamentu Fronteira.
“Imi sei la servisu mesak, imi sei destaka ho membru tuan sira durante fulan tolu nia laran iha munisípiu sira, imi iha esperiénsia bele hamutuk ho família, komunikasaun, lojístika, maibé ba fronteira, imi sei iha esperiénsia iha ne’ebá, fó hanoin ba imi atu kuida imi-nia aan, imi-nia saúde durante fulan tolu nia laran, nune’e bele hetan fali rotasaun ba sira seluk, fronteira ita-nian atu tasi ou rai maran hothotu hanesan, PNTL iha obrigasaun sei hetan rotasaun ba iha ne’ebá”, hateten husi komunikadu ne’e.
Nia husu ba membru sira atu hatudu performansia di’ak, hatudu katak reprezenta nudar instituisaun PNTL hodi halo servisu ne’ebe maka di’ak, tuir regra, tuir lei ne’ebé mak iha. Nune’e, bele fila fali ho isin di’ak no saúde di’ak.
“Agradese tanba ita hotu bele hola parte iha formatura ida-ne’e, ita hanesan PNTL prontu iha kualker tempu, kuandu orden tún atu hala’o servisu iha teritóriu timor laran tomak, iha fronteira tasi, iha rai maran, iha munisípiu ne’ebé de’it, iha estranjeiru mós kuandu nesesita ita-nia dever mak ne’e marka prezensa iha ne’ebá atu hala’o servisu”, friza iha nota.
Jornalista: Natalino Costa
Editór : Zezito Silva
