Ezekusaun OJE 2024 trimestre daruak, Baucau atinje 57%
BAUCAU, 16 jullu 2024 (TATOLI) – Progresu ezekusaun trimestre daruak Orsamentu Jerál Estadu (OJE) 2024 hosi munisípiu Baucau nian atinje 57% hosi tótal orsamentu $9.456.741.00.
Prezidente Autoridade Munisípiu Baucau, Veneranda Eurico Marques Lemos Martins, esplika, hafoin haree fali projetu sira iha tinan ne’e kompañia manán-na’in sira hahú implementa obra iha baze nune’e munisípiu Baucau nia ezekusaun orsamentu rúbrika kapitál dezenvolvimentu to’o iha loron 12 jullu atinje ona 50% ba leten.
“Bainhira kompañia sira hahú halo serbisu, ekipa hosi Obra Públika sei tún halo avaliasaun projetu to’o pursentu 35 mak halo pedidu pagamentu, ha’u fiar iha inísiu fulan-agostu ezekusaun sei to’o 60% to’o 70%,” Prezidente Autoridade Munisípiu Baucau hateten iha Vila Antiga, tersa ne’e.
Eis deputada ne’e, argumenta, portál transparénsia seidauk atualiza persentajen ezekusaun iha semana kotuk, Autoridade Administrasaun Baucau foin ezekuta orsamentu kapitál dezenvolvimentu nune’e iha portál referida hatudu foin atinjimentu 43,6%.
Veneranda lakohi louva ho atinjementu ezekusaun tanba husi planu ne’ebé Autoridade Baucau iha fó importánsia liu ba kualidade la’ós ezekusaun orsamentu aas.
“Ha’u fiar ho ekipa ne’ebé Autoridade iha bele ona fornese ezekusaun ho kualidade,” Veneranda Lemos akresenta.
Husi orsamentu ne’ebé prevee, munisípiu Baucau iha projeitu PDIM hamutuk 13 kompostu projetu tolu mak reapropriasaun tinan 2023 nian hanesan konstrusaun edifísiu edukasaun iha faze finalizasaun, enkuantu edifísiu patrimóniu no lojístika inklui reabilitasaun edifísiu administrasaun Baucau Vila finaliza ona.
Projetu PDIM (Programa Dezenvolvimentu Munisipal) foun ba tinan ne’e rasik hamutuk 10 hanesan konstrusaun edifísiu foun administrasaun postu administrativu Matebian no Quelicai Antiga, konstrusaun edifísiu foun Serbisu Munisipál Notariadu Rejistu Konservatóriu Baucau no sede suku tolu.
“Ami hetan ona klasifikasaun husi Ministériu Administrasaun Estatal katak projeitu PDIM bele asesu ba adiantamentu entre pursentu 25 to’o 30, ne’e bele dehan fó abilidade ba empreza lokál sira atu iha kbiit hahú negósiu ho kualidade,” Veneranda Lemos akresenta.
Tuir dadus husi portál transparénsia Ministériu Finansa, to’o oras 03:00 lokraik, loron 16 jullu, taxa ezekusaun orsamentu munisípiu Baucau trimestrál daruak foin atinje pursentu 43.6 husi tótal orsamentu $9.456. 741.00 ne’ebé fahe ba kompromisu $1,328,382.67, obrigasaun $91,282.61, atuál $4,035,829.83 no saldu hela $4,001,245.89.
Jornalista : Natalino Belo
Editór : Evaristo Soares Martins
