Tribunál liberta arguidu sira baku servisu sekretu FALINTIL
DILI, 17 jullu 2024 (TATOLI) – Tribunál Judisiál Primeira Instánsia Dili (TJPID) iha kuarta (17/7), ohin, prosesa sumáriu ba arguidu 10 ne’ebé mak envolve krime ofensa interigadade fízika grave ne’ebé ka baku membru servisu sekretu husi FALINTIL-Forsa Defeza Timor-Leste foin dadaun iha área Farol, Postu Administrativu Vera Cruz, Munisípiu Dili.
Iha prosesu sumáriu ne’e, Ministériu Públiku reprezenta husi Ivonia Guterres, promove arguidu sira ho krime ofensa integridade fízika grave ne’ebé previstu iha artigu 141 husi Kódigu Penál Timor-Leste.
Juiza Ana Paula Fonseca, hasai despaisu hodi deside liberta totál arguidu hamutuk 10 husi sela detensaun PNTL ho razaun tanba prazu detensaun ba arguidu liu ona katak autoridade polísia halo detensaun ba sira iha domingu (14/7) iha oras 9:00 maibé aprezenta ba Tribunál kuarta (17/7) oras 10:30 dader, tanba ne’e, Tribunál konsidera katak prazu detensaun ba arguidu sira liu oras.
Razaun seluk hodi liberta arguido sira mak Ministériu Públiku nia promosaun ba sira ne’e ninia fundamentasaun la forte, tanba Ministériu Públiku promove arguidu sira ho krime ofensa integridade fízika grave, maibé iha dokumentu ne’ebé Ministériu Públiku aprezenta ba Tribunál la junta fatu ruma ne’ebé bele indika katak arguidu sira halo duni agresaun fízika grave hasoru vítima sira no rezulta vítima sira kanek.
Hafoin desizaun, Defeza husi arguidu sira, Defensór Manuel Amaral hateten, Tribunál deside liberta totál arguido sira husi sela detensaun PNTL liu ona prazu.
“Prazu detensaun ba detidu sira iha de’it 72 oras, maibé detensaun nia prazu liu ona tanba ne’e iha prosesu sumáriu ohin, Tribunál deside hodi liberta totál arguidu sira husi sela detensaun polísia. Relatóriu ne’ebé Ministériu Públiku hato’o ba Tribunál iha kazu ida-ne’e la sufisiente no hamosu dúvida ba Tribunál”, nia dehan.
Rekorda fali katak kazu ne’e akontese iha domingu (14/7) 4:00 madrugada foin lalais ne’e, iha área Farol, Postu Administrativu Vera Cruz, Munisípiu Dili, bainhira membru ekipa sekretu husi F-FDTL na’in-haat, segundu serjentu Rosario Ribeiro, Vitorino Amaral, Jenio Ferlison Sanches no José Pinto halo hela movimentu iha área Farol no sira atu ba hola Pop Mie atu han. Maibé sira hetan baku husi joven sira no rezulta balun kanek grave hodi suku pontu neen no balun suku pontu tolu no seluk suku ho pontu ida.
Jornalista: Natalino Costa
Editór : Zezito Silva
