Problema blanku orijinál BI, atualmente, sei iha faze diskusaun

DILI, 18 jullu 2024 (TATOLI) – Ministru Justisa, Sergio Hornai, dehan problema ba blanku orijinál ba Billete Identidade (BI), daudaun ne’e, sei iha faze diskusaun iha aprovizionamentu ministériu nian.

“Ha’u hakarak reafirma ha’u nia pozisaun hodi hateten katak kona-ba blanku ba Billete Identidade, ha’u bolu ona aprovizionamentu Ministériu Justisa hodi halo prosesu akizisaun ba blanku Billete Identidade. Ida-ne’e ha’u tenke hateten momos katak sei iha hela faze prosesu aprovizionamentu no karik laiha impedimentu ruma ita sei halo akizisaun ba blanku BI iha tempu badak”, Sergio Hornai, hateten ba jornalista sira iha nia knaar fatin Caicoli, kinta, ohin.

Ministru rekoñese katak laiha blanku BI orijen no tenta esforsu hodi konklui buat balun, tanba ne’e husu ba povu atu pasiensia tanba sei trata tuir tramitas legal.

“Ha’u rekoñese katak laiha blanku orijen ba Billete Identidade tanba ne’e ami tenta esforsu másimu hodi konklui buat balun, relasiona ho ida-ne’e. Ha’u rasik ho ita bo’ot sira la aseita para blanku BI laiha tanba ne’e ha’u husu, ita hotu nia hamutuk, tenke pasiensia hodi hein, tanba buat hotu lao tuir tramitas, ha’u garante sei rezolve kestaun ida-ne’e hodi eleva atendimentu di’ak ba ita-nia povu”, nia adianta.

Hornai esplika, BI nu’udar dokumentu primariu ne’ebé mak ema hotu iha hafoin dokumentu sira seluk.

“Billete Identidade ne’e hanesan ita-nia identifikasaun pesoál, ita-nia identifikasaun nasionál ne’ebé bele halo transkirisaun ba dokumentu sira seluk-seluk”, nia afirma.

Totál orsamentu ba tinan fiskál 2024 ba Ministériu Justisa nian hamutuk millaun $13.527.213 ne’ebé kompostu hosi saláriu no vensimentu $8.522, bens no servisu $3.869.046 no laiha osan ba tranferénsia, kapitál menór $9.15.250, enkuantu kapitál dezenvolvimentu $220.725.

Jornalista: Natalino Costa

Editór : Zezito Silva