DILI, 18 jullu 2024 (TATOLI)—Governu Timor-Leste no Governu Commonwealth Austrália, hamutuk ho konsórsiu Greater Sunrise halo reuniaun hodi diskute pontu tolu ba dezenvolvimentu kampu petrolíferu.
Konsórsiu iha Greater Sunrise mak hanesan Timor Gás no Petróleu, Empreza Públika (Timor GAP, E.P) reprezenta 56,56%, Woodside hanesan operadora 33,44% no Osaka Gas 10%.
Prezidente Autoridade Nasionál no Petróleu (ANP) no Xefe Negosiadór Timor-Leste ba Greater Sunrise, Gualdino do Carmo da Silva, hateten, ANP akompaña husi reprezentate Ministériu Finansa (MF) no Ministériu Negósiu Estranjeiru no Kooperasaun (MNEK), hala’o enkontru semana nee iha Dili ho reprezentante sira husi Departamentu Indústria, Siénsia Rekursu, Departamentu Tezouru no Departamentu Negósiu Estranjeiru no Komérsiu husi Governu australianu.
“Iha reuniaun ne’e reprezentante husi konsórsiu Greater Sunrise deside hodi avansa negosiasaun kona-ba kódigu eksplorasaun mineira petróleu, kontratu fahe produsaun no rejime fiskál. Ronda negosiasaun ida-ne’e nu’udar negosiasaun rezente liuhusi reuniaun sira hodi hetan konkordánsia ba dokumentu xave sira ne’ebé sei estabelese enkuadramentu legál nomós regulamentu hodi apoia dezenvolvimentu gás no kondensadu iha kampu Greater Sunrise,” Gualdino do Carmo, relata, iha City8 Manleuna, kinta ne’e.
Notísia relevante : Empreza Woodside prepara relatóriu estudu konseitu ba dezenvolvimentu Greater Sunrise
Desde hahú fali negosiasaun iha outubru 2023, rejistu ona progresu signifikativu hanesan parte sira serbisu hodi kumpe rekezitu sira iha anexu B husi Tratadu Fronteira Marrítima tinan 2018.
Nune’e, parte sira hotu iha kompromisu hodi finaliza, rapidamente posível enkuadramentu legál sira ne’ebé sai baze hodi dezenvolve kampu Greater Sunrise.
Parte sira hotu reafirma sira-nia kompromisu hodi dezenvolve projetu Greater Sunrise ne’ebé fó benefísiu mutuamente ba parte hotu no komersialmente viável sedu liu posível, tuir obrigasaun sira ne’ebé estabelese ona iha Tratadu Fronteira Marrítima.
“Negosiasaun sira hala’o ho frekuénsia no ritmu ne’ebé a’as no sorumutuk husi parte sira ne’e hatudu ami-nia kompromisu konjuntu hodi konkretiza planu hodi dezenvolve Greater Sunrise no apoiu Timor-Leste nia dezenvolvimentu,” nia tenik.
Durante sesaun negosiasaun ne’e, konsórsiu Greater Sunrise mós aprezenta no atualiza kona-ba progresu estudu konseitu ne’ebé daudaun ne’e hala’o hela husi Wood PL, reprezenta konsórsiu Greater Sunrise.
Parte sira ne’e hotu hein rezultadu husi estudu referidu ne’ebé sei konklui iha trimestre dahaat iha tinan ne’e.
Jornalista : Arminda Fonseca
Edtitora : Julia Chatarina
