CDTL realiza semináriu nasionál hodi hasa’e kualidade atleta
DILI, 19 jullu 2024 (TATOLI)– Konfederasaun Desportiva Timor-Leste (CDTL-sigla portugés), sesta ne’e, iha salaun Komisaun Nasionál Eleisaun (CNE-sigla portugés), realiza semináriu nasionál hodi hasa’e kualidade atleta hodi hatudu prestasaun di’ak iha rai laran no diaspora.
Semináriu durante loron ida ne’e ho tópiku “Reforsa Organizasaun Desportiva hodi lori Timor-Leste kompete, Timor-Leste ba Prestasaun”.
Oradór ba semináriu ne’e mak, membru Parlamentu Nasionál , Reprezentante Ministériu Juventude Desportu Arte no Kultura (MJDAK), Reprezentante Konfederasaun Desportiva husi Bali Indonézia ne’ebé fahe mós esperiénsia no reprezentante atleta ho treinadór kada modalidade iha Timor-Leste.
“Semináriu ida ohin loron ne’e importante tebes tanba ita agora prepara ba prestasaun, tanbasa nune’e, dalabarak atividade hotu iha bazeia ba konvite, maibé agora konvite ita tau ba kotuk, ita haree oinsa prepara ita nia atleta sira hodi hetan prestasaun, nune’e ita ba kompete iha eventu internasionál tenke hetan medalla osan-mean,” Prezidente CDTL, Macario Sanches, hateten iha nia intervensaun.
Iha semináriu ne’e Macario hatur pontu lima ne’ebé sai save hodi eleva atleta sira nia prestasaun mak hanesan;
1. Organizasaun desportivu tenke saudavél, organizasaun desportivu sira tenke hatene esforsu atu dezenvolve talentu sira iha baze.
2. Tenke investe iha rekursu umanu hanesan, atleta, treinadór no ofisiál.
3. Tenke iha fasilidade, ba oin tenke investe maka’as iha fasiliade atu nune’e bele hasa’e atleta sira nia prestasaun, fasilidade di’ak ita nia atleta sira ba kompete ho di’ak ita sei hetan osan mean iha eventu internasionál sira.
4. Osan importante tebes atu investe ba iha infrastrutura, fasilita atleta sira ba eventu internasionál no seluk tan.
5. Siensia teknolojia ne’e importante la halimar tanba bele sai barametru ba atleta sira hodi estuda bainhira ba tuir kompetiasaun, atu teste sira nia saúde antes ba tuir kompetisaun ruma, ne’e mós presiza investe agora.
Iha okaziaun ne’e, Treinadór klube Boxe El-Matador, Abilio Orlando dos Santos ne’ebé sai mós hanesan partisipante iha semináriu ne’e hateten, semináriu ne’e importante tebes tanba ko’alia liu kona-ba oinsá atu hadi’a HODI hetan prestasaun atleta sira nian.
“Semináriu ne’e importante tebes, iha atividade ne’e partisipa mós husi ita nia nain-Deputadu balun, sira rona direita saida mak presiza dezenvolve iha área desportu hodi eleva prestasaun atleta sira nian, nune’e sira mós bele hato’o ba Governu rasik oinsá atu tau osan ba iha desportu, tanba dalabarak ita ko’alia fasil, maibé susar atu implementa iha terenu kona-ba kondisaun atleta nian, oinsá mak ita atu hadi’a prestasaun,” Abilio tenik.
Tanba ne’e nia husu ba CDTL atu kria nafatin eventu hanesan ne’e atu motiva atleta no eis atleta sira atu haka’as maka’as hodi hasa’e prestasaun no Governu mós tenke tau atensaun másimu tanba atleta sira mak sai nu’udar eroi foun ba ita nia dezenvolvimentu nasaun.
Iha sorin seluk, Segundu Vise Komite Paralimpíku Nasionál Timor-Leste (CPNTL), Inosencio Ximenes ne’ebé partisipa mós iha semináriu ne’e hateten, semináriu ne’e di’ak tebes tanba partisipa mós husi Konfederasaun desportiva husi Indonézia ne’ebé mai fahe esperiensia kona-ba oinsa has’e atleta sira nia prestasaun.
“Semináriu ne’e di’ak tebes, maluk balun mai husi liur fahe sira nia esperiensia koan-ba oinsa has’e prestasaun atleta sira nian, ba ita nia Governu sira mós tenke tau orsamentu ba kada federasaun no komite sira, nune’e bele hadia mós fasilidade sira ba atleta hafoin hadia atleta sira nia prestasaun,” nia konklui.
Jornalista: Hortencio Sanchez
Editór: Florencio Miranda Ximenes
