Tempu besik, Supremu Tribunál Justisa foti desizaun ba Fuzitivu Arnolfo Teves Jr
DILI, 23 jullu 2024 (TATOLI) – Prokuradór Jerál Repúblika (PJR), Alfonso Lopes, hateten tempu besik Supremu Tribunál Justisa (STJ) foti ona desizaun ba Fuzitivu Arnolfo Teves Jr.
“Agora parte judisiál, Tribunál hasai ona desizaun iha 27 Juñu 2024 deside ita atu estradita Fuzitivu Arnolfo Teves Jr. Entaun husi loron 30 ita tenke respeita prinsipiu kontraditóriu katak, parte arguidu no advogadu nian sira simu ka la’e desizaun Tribunál, sira hatama ona sira nia rekursu agora la’o ona hein tempu besik Supremu Tribunál foti ona desizaun ikus,” Alfonso hateten ba jornalista sira iha Palásiu Prezidensiál Dili, tersa ne’e.
Ho desizaun Tribunál nian ne’ebé kle’ur demais Prezidente Repúblika preokupa maibé Alfonso dehan, desizaun Tribunál nian iha tempu besik sei fó sai hodi estradita Arnolfo ou la’e.
Antes ne’e iha loron 20 maiu 2024 MJ, Sergio Hornai, hateten Governu deside liuhusi estradisaun ba fuzitivu Arnolfo Teves Jr hodi haruka fila ba nia nasaun orijen Filipina.
Desizaun ne’ebé mak Governu liuhusi Ministru Justisa foti ba Fuzitivu Arnolfo Teves Jr mak halo estradisaun ba fuzitivu ne’e signifika Governu admite hodi haruka fila fali fuzitivu refere ba nia nasaun orijen Filipina.
Rekorda fali katak sidadaun Filipinu ho naran Arnolfo Teves JR, iha loron 22 Marsu 2024 mak autoridade PCIC halo detensaun internasionál bainhira sidadaun ne’e halimar hela Golf iha área Metiaut Cristo Rei nian.
Autoridade PCIC detein sidadaun Filipinu ne’e tanba autór intetuál ba krime asasinatu iha Filipina hodi oho Governadór ida iha Filipina. No sidadaun ne’e sai fuzitivu no autoridade PCIC kaer iha Dili.
Jornalista: Hortencio Sanchez
Editór: Florencio Miranda Ximenes
