DILI, 24 jullu 2024 (TATOLI)—Eletrisidade de Timor-Leste, Empreza Públika (EDTL, E.P) daudaun kontrata empreza lokál sira hodi kontinua monta iluminasaun sira iha kapitál Dili, liu-liu iha dalan protokolu sira.
“Relasaun ba vizita Papa nian no planu EDTL, E.P nian durante ne’e ita kontra empreza kontinua monta lampu ilumisaun públika iha dalan protoku sira, nune’e mós ba dalan sira ne’ebé kalan komunidade halo movimentasaun maka’as,” Komísáriu Ezekutivu Servisu Tékniku EDTL, E.P, Latino Jerónimo, informa ba Agência Tatoli, iha ninia knaar fatin, Caicoli, tersa ne’e.
Iha fulan kotuk empreza Tatto Brothers Eletrical monta iluminasaun hahú husi João Paulo Tasi-tolu to’o rotunda Tibar, ne’ebé ninia serbisu konklui ona.
“Agora empreza manán-na’in ida ho naran SM Bark Technology Lda, iha tempu badak sei halo instalasaun lampu iluminasaun hahú husi dalan ba João Paulo nian ne’e tesik mai dalan boot sira mai iha Motael to’o Palásiu Governu nia oin, no lampu sira ne’ebé monta ona tékniku sira akompaña nune’e bainhira a’at ruma ka la lakan bele hadi’a lalais. Ita garante antes Papa mai iluminasaun sira ne’e monta di’ak hotu ona,” nia akresenta.
Notísia relevante : Iluminasaun neen iha merkadu Taibesi la funsiona
Empreza kontinua halo akizisaun iluminasaun photocell no iluminasaun públika, ne’ebé to’o ona armajen, daudaun hein tékniku sira halo pedidu maka bele monta ba fatin sira ne’ebé presiza.
“Akizisaun ne’e ba lampu iluminasaun públika hamutuk unidade 835 no iluminasaun photocell hamutuk hnidade 240,” nia tenik.
Jornalista : Arminda Fonseca
Editora : Julia Chatarina
