DILI, 25 Jullu 2024 (TATOLI) – Ministru Agrikultura, Pekuária, Peska no Floresta (MAAPF), Marcos da Cruz, oriente dirijente sira atu serbisu tuir despaxu, nune’e labele prejudika serbisu ministériu nian, liuliu ba aselera ezekusaun orsamentu tinan ne’e.
“Ha’u hasai ona despaxu atu fasilita di’ak liután serbisu sira iha ministériu ne’e relasiona ho proposta orsamentu ne’ebé diretór sira propoin ho kuantidade orsamentu ne’ebé boot”, governante dehan iha salaun Ministériu Agrikultura, Comoro, ohin.
Marcos da Cruz dehan bainhira submete proposta ho montante orsamentu to’o de’it rihun $50 bele liu husi sekretáriu Estadu sira ne’ebé tutela, maibé proposta orsamentu liu rihun $50 haruka direta ba ministru, nune’e labele atraza serbisu sira iha ministériu.
“Ha’u fó despaxu ida ne’e ba ita-boot sira atu halo buat hotu ne’e la’o lalais, tanba matan barak haree hela serbisu Ministériu Agrikultura nian. Ha’u hasai tiha despaxu ne’e atu fasilita ita-boot sira-nia serbisu, maibé la halo tuir to’o ohin loron, buat hotu sai atraza nafatin, ne’e labele akontese beibeik”, nia lamenta.
Governante ne’e salienta katak nia mak sei asume responsabilidade ba Primeiru-Ministru bainhira husu ezekusaun orsamentu ministériu nian. Tanba ne’e mak atu reforsa konteúdu husi despaxu ne’e mak nia husu ba diretór sira atu lee didi’ak saida mak hakerek ona iha laran, nune’e bele halo sasán sira la’o tuir nia dalan hodi bele aselera zekusaun orsamentu ministériu nian.
“Ha’u hakarak ita-boot sira sai hanesan dirijente tenke halo serbisu tuir orientasaun sira ne’ebé mak hatuur ona iha suratahan sira ne’e. Tanba, planu ita mak halo, ita maka teke ezekuta ho di’ak, nune’e bele hasa’e konfiansa ba ita-nia serbisu sira”, nia afirma.
Ministru subliña katak ba tinan ida ne’e maka diresaun sira iha Ministériu Agrikultura nia ezekusaun ki’ik to’o tinan remata, automatikamente iha 2025 sei hatún nia nia orsamentu, tanba laiha kbiit no kapasidade atu ezekuta rasik verba ho responsabilidade.
Tuir Portál Transparénsia, ezekusaun orsamentu MAPPF nian to’o ohin loron foin atinje 39,6% husi totál orsamentu alokadu hamutuk millaun $30,7 ne’e prevee ba ba saláriu no vensimentu millaun $9,4, bens no servisu millaun $9,3, transferénsia públika $459.007, kapitál menór millaun $4,8 no kapitál dezenvolvimentu millaun $6,7.
Notísia relevante: Ezekusaun orsamentu husi MAPPF foin atinje 10,9%
Jornalista: Tomé Amado
Editora: Maria Auxiliadora
