DILI, 29 jullu 2024 (TATOLI) – Tribunál Judisiál Primeira Instánsia Dili (TJPID) iha segunda (29/7), ohin, kontinua halo interrogatóriu dahuluk ba kazu tranferénsia osan ilegál ho montante millaun $42 ne’ebé mak envolve husi arguidu na’in-lima.
Iha interrogatóriu ne’e, Ministériu Públiku ne’ebé reprezenta husi Prokuradór Domingos Goveia Leite, João Marques no Pedro Baptista rekere baTribunál hodi solisita ba Banku Mandiri hodi trava osan restu millaun $39 ne’ebé sei rai hela iha Banku Mandiri.
Tuir informasaun ne’ebé Agência TATOLI asesu katak Banku Mandiri atu halo fali transferénsia osan restu millaun $39 ne’e ba Singapura. Maibé Ministériu Públiku la aseita ida-ne’e ho razaun osan sira ne’e nu’udar objetu krime ona tanba ne’e hein desizaun Tribunál.
Tanba ne’e, Ministériu Públiku hato’o rekerimentu ba Tribunál hodi husu ba banku atu kansela tiha osan restu millaun $39 ne’ebé iha hela banku hodi labele halo transferénsia.
Ministériu Públiku mós husu ba Tribunál atu solisita ba banku hodi blokeia konta bankaria arguidu na’in-lima nian, hodi evita osan millaun $42, ne’ebé antes ne’e arguidu sira halo ona levantamentu iha sira-nia konta bankaria hodi labele sai ba rai liur.
Defeza husi arguidu na’in-lima, Defensór Públiku, Eustáquio Guterres, hateten Ministériu Públiku rekere ba Tribunál atu blokeia levantamentu ho osan millaun $42.
“Tribunál aseita pedidu Ministériu Públiku nian, hodi manda ona karta ba banku hodi husu banku blokeia kualker levantamentu no tranferénsia ba osan millaun $42 hodi hein prosesu legál ne’ebé lao hela iha Tribunál”, Estáquio Guterres hateten ba jornalista sira iha Tribunál, segunda ne’e.
Interrogatóriu dahuluk ba kazu tranferénsia osan ilegál ho millaun $42 ne’e, Tribunál liuhusi Juiz Titulár Afonso Carmona, deside suspende provizóriu ba fali tuku 14:30 molok foti desizaun ikus ba kazu ne’e.
Jornalista: Natalino Costa
Editór : Zezito Silva
