DILI, 31 jullu 2024 (TATOLI)—Ministru Transporte no Komunikasaun (MTK) liuhusi Autoridade Aviasaun Sivíl Timor Leste (AACTL, sigla portugés) daudaun ne’e halo hela diskusaun atu haree regulamentu no rekezitu ba empreza aérea AirAsia bele hetan lisensa halo operasaun iha Timor-Leste.
“Ba AACTL, ha’u orienta ona sira atu haree tuir regulamentu ne’ebé aplikável. Ha’u simu ona informasaun adisionál no tenke haree ba dokumentu sira ne’ebé iha. Ita tenke hatene katak desizaun Estadu nian atu fó dalan ka lae tenke haree ba buat hotu, tanba ita mós rona keixa husi komunidade no ita haree nafatin posibilidade saida mak tenke foti, ne’e prosesu ne’ebé naruk no sira mós sei iha hela preparasaun nia-laran,” Ministru Transporte no Komunikasaun, Miguel Marques Gonçalves Manetelu, hateten, iha Palásiu Governu, kuarta ne’e.
Governu sei foti desizaun ne’ebé kumpre regra no lei sira ne’ebé aplikável no garante sustentabilidade setór privadu doméstiku ne’ebé investe mós iha setór aviasaun.
Notísia relevante : AirAsia rejeita informasaun presu billete $50 ba rota Dili-Denpasar
AirAsia daudaun ne’e hala’o hela faze preparasaun sira, ne’ebé hein desizaun sira ne’ebé sei foti ein termu polítikamente husi Ministériu Transporte no Komunikasaun, Primeiru-Ministru, Kay Rala Xanana Gusmão ka diretamente husi Konsellu Ministru.
“Diskusaun téknika sira sei la’o hela maibé polítikamente sira seidauk fó to’o agora. Ha’u husu ba AACTL atu labele fó komentáriu polítiku sira no sira tenke konsentra iha sira-nia dezempeñu, se lae sei laiha independénsia iha serbisu sira,” nia tenik.
AirAsia hanesan empreza aérea ida ne’ebé konsentra iha Aeroportu Internasionál Kuala Lumpur, Malázia no iha subsidiáriu oin-oin hanesan Thai AirAsia, Indonesia AirAsia, Philippines AirAsia, no AirAsia Índia.
PT AirAsia Indonesia Tbk ofisialmente sai hanesan empreza inan ba PT Indonesia AirAsia iha loron 29 dezembru 2017. Liuhusi nia subsidiáriu, PT Indonesia AirAsia hanesan empreza ne’ebé hala’o negósiu aviasaun komersiál programadu iha Indonézia.
Jornalista : Arminda Fonseca
Editora : Julia Chatarina
