AirAsia rejeita informasaun presu billete $50 ba rota Dili-Denpasar
DILI, 17 jullu 2024 (TATOLI)—Diretór Asuntu Governasaun no Komunikasaun AirAsia, Eddy Krismeidi, rejeita informasaun ne’ebé sai diskusaun iha rede sosiál Facebook, ne’ebé hateten katak empreza aérea ne’e fó presu billete $50 ba viajen ho rota Dili bá Denpasar.
“Ida-ne’e hoax, tanba ami seidauk lansa programa ida-ne’e,” Eddy Krismeidi hateten ba Agência Tatoli, via telefónika, kuarta ne’e.
Kona-ba asuntu ne’e, Xefe Autoridade Rede no Aeroportu Indonesia AirAsia, Edwin Mdl, mós hateten, sira-nia parte foin iha planu atu loke voo iha Timor no to’o oras ne’e seidauk iha informasaun ofisiál kona-ba presu billete.
“Ami nunka fó sai deklarasaun kona-ba presu billete nian, tanba ami foin planu atu loke rota voo Dili-Denpasar iha setembru 2024,” Edwin Mdl, informa, ba Agência Tatoli, via telefónika.
Notísia relevante : Empreza AirAsia iha interese hala’o voo husi Bali-Dili
Antes ne’e, iha loron 08 jullu 2024, Edwin Mdl hasoru malu ho Primeiru-Ministru, Kay Rala Xanana Gusmão, hodi hato’o planu atu loke operasaun AirAsia ba rota Dili-Depansar.
AirAsia nu’udar empreza ida-ne’ebé nia sede iha Aeroportu Internasionál Kuala Lumpur, Malázia no iha subsidiáriu oin-oin hanesan Thai AirAsia, Indonesia AirAsia, Philippines AirAsia, no AirAsia Índia.
PT AirAsia Indonesia Tbk ofisialmente sai hanesan kompañia inan ba PT Indonesia AirAsia iha loron 29 Dezembru 2017. Liu husi nia subsidiariu, PT Indonesia AirAsia (IAA), empreza ida-ne’e hala’o negósiu aviasaun komersiál programadu iha Indonézia.
Jornalista : Arminda Fonseca
Editora : Julia Chatarina
