iklan

EKONOMIA, INTERNASIONÁL, DILI, HEADLINE

Empreza AirAsia iha interese hala’o voo husi Bali-Dili

Empreza AirAsia iha interese hala’o voo husi Bali-Dili

Primeiru-Ministru, Kay Rala Xanana Gusmão, hala'o enkontru ho Xefe Rede no Autoriade Aeroportuária PT Indonesia AirAsia, Edwin Mdl, iha Palásiu Governu, segunda (08/07). Imajen Tatoli/Francisco Sony

DILI, 08 jullu 2024 (TATOLI) – Empreza aviasaun husi nasaun Indonézia ho naran PT. Indonézia AirAsia, aprezenta ona interese ba Primeiru-Ministru (PM), Kay Rala Xanana Gusmão, hakarak atu espande área operasaun husi Denpasar-Bali, Repúblika Indonézia mai Dili, Timor-Leste.

Planu ne’ebé empreza aprezenta ba Xefe Governu maka, hakarak atu hahú voo dahuluk iha inísiu fulan setembru tinan 2024.

“Ami mai hasoru-malu ho Primeiru-Ministru hodi aprezenta ami-nia interese hakarak atu halu’an ami nia área operasaun. Iha ami-nia planu, hakarak semo hosi Denpasar mai Dili iha inísiu fulan setembru,” Reprezentante AirAsia Edwin, hateten hafoin hamutuk ho delegasaun hasoru-malu ho Priemiru-Ministru iha Palásiu Governu, segunda ne’e.

Empreza aviasaun ne’e mós iha esperansa boot ba prosesu hotu-hotu sei la’o ho lalais atu bele realiza duni voo dahuluk iha inísiu fulan setembru, nune’e bele tula mós pasajeiru sira hosi Ázia ne’ebé hakarak atu partisipa hodi asiste vizita Papa Francisco mai Timor-Leste.

Xefe Governu rekomenda ba PT Indonézia AirAsia atu koordena ho Ministériu Transporte no Komunikasaun (MTK) Timor-Leste atu bele trata asuntu ne’e, nune’e bele realiza planu espansaun operasaun mai Díli.

AirAsia hanesan kompañia aérea ho servisu kompletu iha tinan 1993 no hahú operasaun iha loron 18 fulan-novembru tinan 1996 to’o ohin loron.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!