Tribunál aplika pena únika ba arguidu Eduardo ba kazu hamate Dodi
DILI, 31 jullu 2024 (TATOLI) – Tribunál Judisiál Primeira Instánsia Dili (TJPID) liuhusi Juiza Prosesu, Ercilia de Jesus, hasai akordaun hodi deside aplika pena únika tinan 15 ba arguidu Eduardo ne’ebé hakotu Dodi nia vida iha área Kintal Bo’ot, Suku Santa Cruz, Postu Administrativu Nain Feto, Munisípiu Dili tinan kotuk tanba fatu sira iha julgamentu provadu hotu katak arguidu mak oho.
“Tuir fatu sira ne’e, aprezenta iha Tribunál, arguidu Eduardo konfesa ba Tribunal katak nia mak oho duni Dodi, uza kanuru suru rai henek hodi baku dala barak iha vítima nia oin to’o forsa laiha no arguidu Eduardo sona tan tudik ne’ebé kaer ba vítima nia kabun dala rua o vítima Dodi hakotu iis iha fatin akontesimentu”, Juiza Ercilia de Jesus bainhira halo leitura akordaun iha sala julgamentu Tribunál, kuarta, ohin.
Nia haktuir, arguido Eduardu dekarak ba Tribunál, katak nia mako hi Dodi, tanba ho situasaun tensaun no la kontrola aan.
“Iha julgamentu arguidu Eduardo rasik deklara ba Tribunál, nia mak oho matebian Dodi, tanba momentu ne’e nia iha hela situasaun nervozu ne’ebé labele kontrola nia aan. No arguidu rasik mós husu deskulpa ona ba Tribunál. Haree ba hahalok arguidu nian, Tribunál aplika pena únika prizaun tinan 15 ba krime ne’ebé Ministériu Públiku imputa”, nia adianta.
Juiza, Tribunál nia desizaun halo mós alterasaun ba krime omisídiu agravadu ne’ebé antes ne’e Ministériu Públiku akuza ba arguidu Eduardo hodi altera ba fali krime omisídiu simples ho nia agravasaun sira no krime arma branka.
Iha biban ne’e, Ercilia hateten, ba arguidu Jaime, Tribunál aplika pena prizaun tinan lima no Tribunál deside halo mós alterasaun jurídika ba krime omisídiu agravadu iha ne’ebé antes ne’e MinisteÉriu Públiku akuza ba arguidu ba fali krime ofensa integridade fÍzika simples ho nia agravasaun sira.
“Arguidu Jaime, Tribunál aplika pena prizaun tinan lima, tanba tuir sasin sira nia depoimentu ne’ebé deklara ba Tribunál katak sasin sira haree duni arguidu mak tuku matebian Bobi iha parte hasan, nune’e vítima monu, maibé arguidu lahalo tán asaun ruma. Nune’e arguidu Eduardo mak mai hodi baku matebian ho kanuru suru rai henek dala barak ba matebian nia ulun to’o sona tán”, nia deklara.
Enkuantu ba arguidu Angelmo, Tribunál absolve husi krime omisídiu agravadu no krime arma branka tanba laiha prova ne’ebé hatudu arguidu envolve iha kazu oho Dodi.
“Tanba ne’e, Tribunál analiza hotu situasaun sira ne’e no prova sira, arguidu mak konfensa ba Tribunál ho nune’e Tribunál entende deklara absolve arguidu Angelmo husi krime ne’ebé Ministériu Púbklu akuza ba nia”, afirna Juiz.
Juiza subliña, Tribunál husu ba arguidu na’in-tolu, Eduardo no Jaime atu selu osan $5.000 ba família matebian Dody, nudar jestu família rua atu dame malu hikas tanba to’o agora seidauk dame.
Jornalista: Natalino Costa
Editór : Zezito Silva
