DILI, 31 jullu 2024 (TATOLI) – Trbunál liuhusi Juiz Titulár, Afonso Carmona, hasai despaisu ikus hodi aplika medida koasaun Prizaun Preventiva ba arguidu na’in-tolu, kompostu husi Nijerianu na’i-rua ho insiál DV no HB inklui timoroan na’in-ida ho inisiál FSF.
Razaun Tribunál aplika medida koasaun Prizaun Preventiva, ba arguidu sira, tanba prosesu interogatóriu ne’ebé iha, fatu sira provadu hotu katak arguidu na’in-tolu iha indísiu forte ne’ebé envolve krime ne’ebé Ministériu Públiku imputa ba sira.
Arguidu timoroan na’in-rua seluk ho inisiál DSM ho AFS mak Tribunál aplika medida koasaun aprezentasaun periódika tanba laiha fatu ne’ebé komprova katak arguidu na’in-rua ne’e envolve iha krime ne’ebé ministériu imputa ba sira.
Defeza husi arguidu DV no HB, Defensór Públiku Eustáquio Guterres, afirma Tribunál hasai despaisu ikus hodi aplika medida koasaun prizaun preventiva ba arguidu DV no HB tanba prova interrogatóriu dahuluk, fatu sira provadu hotu.
“Razaun Tribunál aplika prizaun preventiva ba ha’u nia kliente na’in-rua ne’e, tanba Tribunál haree katak krime ne’ebé imputa ba sira no pedidu hosi Ministériu Públiku ne’ebé aprezenta iha Primeiru Interrogatóriu, iha indísiu forte ho nune’e mak aplika prizaun preventiva ba ami-nia kliente Nigerianu-na’in rua ne’e”, Guterres dehna ba jornalista sira iha Tribunál kuarta ne’e.
Nia dehan, defeza husi arguidu sira sei la nonok no sei kontesta despaisu ne’ebé Tribunál hasai hodi aplika prizaun preventiva ba nia kliente sira.
“Ami sei hatán hodi halo rekursu iha loron 15 hodi kontesta despaisu Tribunál nia ba ha’u-nia kliente”, nia dehan.
Iha fatin hanesan, Defeza husi arguidu FSF Octavio Cardoso, hateten Tribunál hasai despaisu ikus hodi aplika medida koasaun prizaun preventiva iha delizeÉnsia primeiru interogatóriu durante loron lima.
Nia dehan, haree ba fatu hotu ne’ebé maka prodús, atu hateten katak despaisu husi Tribunál ne’e, hanesan defeza konsidera segredu justisa no ida-ne’e mak relativamente ho despaisu ne’ebé Tribunál aplika medida koasaun ba arguidu na’in-lima, husi sira ne’e na’in-tolu prizaun preventiva.
Despaisu Tribunál, la’os última tanba defeza mantein ninia pozisaun katak sei rekore prosesu balun ba Tribunál Rekursu hodi kontesta despaisu husi Tribunál Judisiál Primeira Instánsia Dili.
‘’Ami sei la nonok tanba ne’e ami sei haree iha loron 15 hodi hato’o ami-nia kontestasaun ida ne’e no hahú aban ka bainrua, ami hahú halo rekursu”, nia konklui.
Hafoin Tribunál hasai tiha depaisu ba arguidu na’in-lima, tuir observasaun Jornalista Tatoli iha terenu nota katak, PCIC tau alzema (brogol) iha arguidu Nijeriano DV no HB inklui arguidu timoroan ho inisiál FSF, PCIC transporta kedan ba iha Prizaun Becora hodi kumpre medida koasaun prizaun preventiva ne’ebé Tribunál deskreve ona iha despaisu.
Antes PCIC transporta arguidu na’in-tolu ba Prizaun Becora, espoza husi arguidu timoroan ho inisiál FSF tanis no hakuak nia laen metin ho matan-been tanba hanesan fen la hatene nia laen envolve kazu ne’e to’o kumpre medida koasaun prizaun preventiva iha Prizaun Becora.
Jornalista: Natalino Costa
Editór : Zezito Silva
