MAPPF fasilita formasaun ba estensionista Oé-Cusse kona-bá analiza negósiu agríkola
OÉ-CUSSE, 01 agostu 2024 (TATOLI) – Ministériu Agrikultura, Pekuária, Peska no Floresta (MAPFF), liuhusi Diresaun Nasionál Agrikultura, Ortikultura no Protesaun Planta, Departamentu Mekanizasaun, Produsaun, Alimentasaun Jestaun post Kolleta, kinta ne’e ne’e fasilita formasaun ba tékniku estensionista suku 18 iha Rejiaun Administrativa Espesiál Oé-Cusse Ambeno (RAEOA) kona-bá analiza negósiu agríkola.
“Objetivu atu aumenta kapasidade estensionista sira-nian, tanba treinamentu ne’e la’ós buat foun maibé refresh training ba sira, tanba tinan barak ona sira la partisipa formasaun kona-bá analiza negósiu agríkola,” Xefe Gabinete Diretór Jerál Agrikultura Kafé no Planta Indústria iha MAPFF, Armindo da Silva, ko’alia iha salaun agrikultura Oé-Cusse.
Notísia relevante: Rezultadu produsaun batar no hare époka 2024 iha Oé-Cusse foin atinje tonelada tolu
Nia fó hanoin ba estensionista sira, presiza hatene kona-bá produsaun rai laran tanba dalaruma agrikultór sira hetan subsídiu barakliu, maibé folin sasán ne’ebé sira prodús fa’an iha merkadu karun nafatin.
“Entaun liuhosi formasaun ne’e bele hatene, ezemplu natar ektare ida prodús foos karik, ninia analiza ne’e bele manán hira husi foos ne’e, nune’e ba oin ita bele haree atu nune’e sira labele fa’an karun liu, karik fa’an karun liu, ema sei refere liu sosa produtu rai-li’ur,” nia salienta.
Diretór Rejionál Agrikultura, Amaro Efi, konsidera formasaun ne’e importante ba estensionista suku inklui ofisiál crop-cutting sira, tanba formasaun ne’e ho objetivu atubele hakbi’it sira-nia koñesmentu.
“Sei ita ko’alia kona-bá analiza negósiu agríkola, ne’e ligadu ba kustu orsamentu no reseita ninian, tán ne’e ita koordena ho Governu Sentrál, bele kontinua hafanu ita-nia estensionista sira, atubele halo buat ruma iha suku,” nia katak.
Nia esplika, estensionista sira-nia kna’ar loloos, oinsá sira bele sai fasilitadór liuliu indika ba povu atu, estabelese grupu, nune’e motiva grupu sira hatudu sira-nia inisiativa ho tékniku iha baze, atu grupu agrikultór sira-ne’ebé estabelese ne’e, bele moris ho di’ak.
Notísia relevante:Agrikultura Oé-Cusse aloka $9,120.00 kompra fini prepara ba époka 2024
Lucas Poto, nu’udar estensionista husi suku Malelat, sub-rejiaun Pássabe, agradese ba Ministériu Agrikultura, bele fasilita formasaun, nune’e bele sai matadalan atu implementa iha baze.
“Importante ami nu’udar fasilitadór tékniku estensionista iha baze, atu hatene kle’an liután oinsá fasilita komunidade atu analiza ba reseita no gastu liuhusi atividade negósiu produtu agrikultura, tanba ita produtu lokál barak maibé nia folin maka’as liu fali produtu importasaun,” nia katak.
Notísia relevante: Agrikultura Bobonaro propoen aumenta estensionista 12 hodi reforsa serbisu iha suku sira
Entretantu, totál tékniku estensionista, Diresaun Rejionál Agrikultura Oé-Cusse, koloka hamutuk na’in-24 destaka ona iha suku 18 hodi apoia serbisu agrikultór sira iha área rurál.
Jornalista: Abílio Elo Nini
Editora: Maria Auxiliadora
