Top

PNTL organiza enkontru avaliasaun ba servisu investigasaun kriminál nian

PNTL organiza enkontru avaliasaun ba serbisu investigasaun kriminál nian. Foto/PNTL

DILI, 02 Agostu 2024 (TATOLI ) – Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, lidera enkontru avaliasaun ne’ebé organiza husi Departamentu Investigasaun Kriminál Nasionál kona-ba kualidade serbisu investigasaun sira, nune’e labele fó insatisfasaun ba públiku.

Enkontru ne’e partisipa husi Xefe Seksaun Investigasaun husi kada munisípiu hodi diskute problema ne’ebé  hasoru durante ezerse funsaun hanesan investigadór.

Komadante Departamentu Investigasaun Kriminál Nasionál (DIKN), Superintendente Polísia João Belo Reis, hateten iha sorumutu ne’e Komisáriu Jerál Polísia husu ba membru Departamentu Investigasaun Kriminál atu hala’o serbisu ho responsabilidade, nune’e sai investigadór ne’ebé profisionál.

Nia salienta Komisáriu Jerál hameno katak atu sai polísia investigasaun kriminál ida profisionál presiza vontade atu serbisu no halo atendimentu ba públiku ho di’ak no la presiza ekipamentu modernu liu mak halo knaar.

Iha enkontru ne’e ko’alia mós kona-ba kualidade servisu Komandante Departamentu Investigasaun Kriminál sira-nian bainhira halo atendimentu públiku, inklui insatisfasaun husi públiku relasiona ho kualidade prosesu investigasaun sira.

“Ami konsidera insatisfasaun komunidade sira-nia ba ami-nia serbisu sira ne’e sai traballu ida atu hadi’ak liután hodi minimiza problema sira iha futuru. Tanba, bainhira servisu investigasaun kriminál aprezenta kazu sira ba Ministériu Públiku kona-ba atendimentu ba pesoál sira mosu lamentasaun”, nia dehan iha Caicoli.

Ho nune’e, liuhusi intervensaun Komandante Jerál PNTL nian ne’e atu hadi’a serbisu investigasaun nian no bainhira hasoru difikuldade ruma tenke halo koordenasaun di’ak atu hamenus polémika iha públiku.

“Ami sente problema balun, tanba ami-nia serbisu la profisionál. Ami nu’udar umanu  tenta atu hadi’a ba futuru no profisionál liután”, nia promete.

Jornalista: Tomé Amado

Editora: Maria Auxiliadora

Publisidade

Leave a Reply

Latest Post

error: Content is protected !!