DILI, 05 agostu 2024 (TATOLI)–Abitante iha Dili konsidera Governu liuhosi Ministériu Komérsiu no Indústria (MKI) seidauk iha kontrolu di’ak ba estabelesimentu komersiál hanesan loja no kioske iha Timor-Leste.
“Ita haree ba negósiu ne’e, Governu seidauk iha kontrolu di’ak ba ema ne’ebé mak loke loja no kioske iha Timor-Leste. Tanba buat ne’ebé mak ita-nia negosiante bele fa’an, sira mós fa’an. Se bele Governu tenke kontrola másimu ba asuntu referidu. Presiza iha regulamentu hodi regula negosiante xineza fa’an iha one dolar,” Abitante iha Dili, Teresa de Jesus, hateten ba Agência Tatoli, iha Universidade Orientál Timor-Lorosa’e (UNITAL), Becora, segunda ne’e.
Nia nota, kondisaun ne’e fó impaktu no halo impedimentu ba negosiante sira iha rai-laran.
“Ita-nia maluk sira-ne’ebé loke kioske kiik sira fa’an la folin, ikus mai sira-nia sasán sai fohuk no liu prazu tanba loja xineza mós fa’an hotu. Realidade ne’ebé mak iha, ema gosta mak tama-sai loja xineza,” nia akresenta.
Nune’e mós, Abitante ne’ebé hela mós iha Dili, Elias da Costa, husu Governu atu tau atensaun ba kondisaun ne’e.
“Hanesan sidadaun ida, ha’u hanoin katak Governu Timor-Leste presiza haree no tau-matan maski ita hatene katak xineza sira sempre investe mós ba Governu maibé presiza halo separasaun ba negósiu entre sira ho timoroan rasik,” Elias da Costa, fó hanoin.
Notísia relevante : MCI enkoraja joven emprezariál kontinua kontribui dezenvolvimentu ekonómiku
Nia dehan, tuir loloos xineza sira bele fa’an sasán no loke negósiu ne’ebé timoroan labele halo, atu nune’e timoroan mós bele hetan oportunidade hodi fa’an sira-nia produtu lokál rasik tanba realidade hatudu katak xineza sira-nia prezensa bele lori problema boot ba agrikultór sira tanba laiha espasu atubele fa’an produtu ne’ebé sira kuda no prodús.
“Governu di’ak liu investe ba setór agrikultura nune’e timoroan sira bele hadi’a no sira badinas hodi prodús orijinalidade produtu Timor nian atu nune’e timoroan mós bele sente ukun rasik-an. Tanba xineza nia prezensa mós halo timoroan sai bainka ba nia rai rasik,” abitante ne’e observa.
Nune’e mós, Abitante iha fatin hanesan, Francisca Ximenes, konsidera xineza taka ona dalan ba negosiante timoroan ne’ebé fa’an ka loke negósiu kiik sira.
“Ha’u hanoin ida-ne’e loloos labele akontese ba timoroan sira, tanba sidadaun barak liu mak dependénsia hela ba negósiu kiik hanesan kioske ka loja, ne’ebé sidadaun rasik bele fa’an hanesan ho xineza sira. Signifika xineza sira taka dalan ona ba sidadaun hodi loke negósiu iha sira-nia rain rasik,” nia katak.
Nune’e, Francisca Ximenes husu Governu liuhusi ministériu relevante tenke halo kontrola ba sidadaun xineza sira ne’ebé fa’an sasán sira ne’ebé timoroan sira bele fa’an hodi sustenta ba povu nia nesidade.
“Hakarak rekomenda ba Governu atu kria lei ida rigorosu ba sidadaun xineza sira atu nune’e sira bele la’o,” nia tenik.
Tuir Abitante, Marcelino Carvalho, bainhira iha Timor-Leste mak iha kompetisaun komersiál mak povu labele kompete tanba kapasidade enonomia ne’ebé sosa no fa’an fali.
“Tuir ha’u-nia prespetiva pesoál, primeiru ita haree ba komersiál ne’ebé xineza sira fa’an iha Timor-Leste. Agora buat ne’ebé ita haree mak negosiante timoroan fa’an ne’e xineza mós fa’an hotu. Ida-ne’e hanesan fali kompetisaun komersiál. Ha’u hanesan sidadaun, husu ba Estadu atu kontrola mós ba asuntu ida-ne’e, buat ne’ebé xineza labele ka la merese fa’an tenke kontrola nune’e bele fó lukru ba negosiante timoroan. Ezemplu loja one dolar, ha’u hanoin xineza la merese atu fa’an tanba husi nasaun seluk mai ne’e tenke fa’an buat ne’ebé la’ós ho folin hanesan ema fa’an iha rai-laran nian. Ida-ne’e Ministériu Komersiu tenke tau atensaun,” nia salienta.
Jornalista : Osória Marques
Editora : Julia Chatarina
