CAC sei detein kargu xefia la kumpre regra ba utilizasaun karreta Estadu

DILI, 05 agostu 2024 (TATOLI) – Komisáriu Komisaun Anti-Korrupsaun (CAC, sigla portugés), Rui Pereira dos Santos, hateten kargu xefia no funsionáriu sira ne’ebé la kumpre regra ba utilizasaun karreta estadu, sei hetan detensaun.
“Kuandu ita bo’ot sira abuza bebeik ida-ne’e, mak ekipa konjunta hetan, CAC sei halo prosesu no halo kedan detensaun ba ita bo’ot sira tanba CAC mós iha sela detensaun”, Rui Pereira hateten ba jornalista sira ne’ebé halao iha salaun ekontru SEFOPE, Caicoli, segunda ne’e.
Nia dehan, CAC simu informasaun barak liga ho utilizasaun karreta Estadu iha fora oras servisu.
“Ami sempre hateten ona utilizasaun ba karreta Estadu ne’e klaru katak ba kargu xefia no funsionáriu ne’ebé atu utiliza veíkulu Estadu tenke iha oras servisu, se laos oras servisu ne’e labele. Utilizasaun ba karreta Estadu iha sabádu no domingu mós hanesan tenke iha guia de marca, se laiha karta, ida-ne’e labele. Tanba kargu xefia sira ne’e hetan ona osan alimentasaun, tanba ne’e sira labele lori karreta lao husi fora oras servsu”, nia adianta.
Rui dehan, CAC sei koordena ho Funsaun Públika, Inspesaun Jerál Estadu, DNTT no Autoridade polisiál atu efetivamente halo operasaun hodi kontrola ba veíkulu Estadu sira hodi labele halo sirkulasaun liu oras servisu.
“Komisaun Anti-Korrupasaun sei koordena ho Funsaun Públika, Inspesaun Jerál Estadu, DNTT, no PNTL atu kontrola másimu ba sirkulasaun karreta Estadu”, nia dehan.
Komisáriu CAC hateten, Instituisaun Estadu balun mak hola parte iha Komisaun Organizadora ba preparasaun vizita Sua Santidade Papa Francisco.
“Ami seidauk simu lista definitiva insitituisaun hira mak hola parte iha komisaun organizadora ba vizita Papa Francisco, ami sei kontatu ba vise Prezidente Komisaun Organizadora hodi hato’o lista mai para ita bele autoriza sira ne’e mak bele halo movimentu, restante husi ne’e labele, bainhira iha funsionáriu ka kargu xefia balun mak viola regra ba utilizasaun veíkulu Estadu, ita sei kaer no halo prosesu ba nia”, nia konklui.
Jornalista: Natalino Costa
Editór : Zezito Silva

