Governu anteriór: CAC suspeita mosu má administrasaun iha SEFOPE
DILI, 05 agostu 2024 (TATOLI) – Osan subvensaun públika husi Sekretaria Estadu Formasaun Profisionál Empregu (SEFOPE) 2019-2020, la halo kontrolu bainhira benefisiáriu sira utiliza sala.
Komisáriu Komisaun Anti-Korrupsaun (CAC, sigla portugés), Rui Pereira dos Santos, subliña benefisiáriu sira mak hakiak fahi, suku ropa, haforsa atividade sentru formasaun, hirak ne’e ezekuta orsamentu maibé uza fali ba atividade seluk.
“Má administrasaun tanba ita bo’ot sira hatene, osan subvensaun públika ne’e normalmente mai ho atividade hakiak fahi, suku ropa, haforsa atividade sentru formasaun sira, maibé osan sira ne’e mai, benefisiariu balun uza fali halo fali ba buat seluk ho nune’e ita SEFOPE laiha kontrolu ba ida-ne’e”, nia dehan.
Komisáriu ne’e hateten, CAC rekomenda kestaun 14, atu SEFOPE toma atensaun, mak hadia atribuisaun osan subvensaun públika ba benefisiáriu.
“Sim, iha peskiza ne’e mosu duni iregularidade iha prosesu utilizasaun osan subvensaun públika katak mosu má administrasaun iha utilizasaun osan subvensaun públika ne’ebé SEFOPE atibui ba benefisiáriu sira”, Rui hateten ba jornalista sira hafoin lansamentu relatóriu CAC, 2019 to’o 2020, ne’ebé halo iha SEFOPE ho tema “Estudu no avalizasaun risku ba atividade subvensaun públika, Caicoli, segunda ne’e.
Tuir nia, SEFOPE iha parseiru ho sentru formasaun sira ne’ebé kapasita joven sira iha lian inglés, portugés, japanes no lian Korea, maibé sentru forsaun sira ne’e barak mak la reabilita inklui joven barak iha abilidade hafoin remata sira-nia formasaun iha sentru formasaun.
“Ami haree SEFOPE parseiria barak ho sentru formasaun, ami-nia rekomedasaun mak sé bele osan subvesaun públika ne’e SEFOPE tulun sentru formasaun sira tanba ita haree sentru formasaun sira kondisaun aat ona no se bele osan subvensaun ne’e SEFOPE bele apoia joven kreatividade sira tanba ita-nia joven barak mak iha skill atu halo buat ruma maibé difisil tanba sira laiha apoiu ruma no ami husu SEFOPE, atu ba oin hadia atribuisaun osan subvensaun públika, kuandu atribui osan subvensaun tenke kontrolu ho rigór atu osan ne’e bele benefísia ba benefisiáriu sira para sira hadia moris no tulun mós ba ema seluk”, nia dehan.
Rui hateten, Komisaun Anti-Korrupsaun seidauk foti medida ruma relasiona ho má adiministrasaun ne’ebé akontese iha SEFOPE tanba relatóriu ne’e mak foin halo lansamentu.
“Ami sei fó tempu ba SEFOPE atu bele fó resposta ruma mai ami nia relatóriu peskiza ida-ne’e, kuandu iha indísiu korrupsaun bele halo prevensaun, atu evita hodi labele mosu tán hahalok sira hanesan ne’e”, nia afirma.
Komisáriu CAC kompromete sei halo mós peskiza ba institusaun Estadu seluk tanba dala ruma osan subvensaun púbika tuir lei atribui de’it ba grupu benefisiáriu sira, maibé iha institusaun Estadu balun hanesan Ministériu Komérsiu Indústria Ambiente iha 2015 atribui mós ba empreza sira, ne’e labele.
Iha fatin hanesan, Sekretáriu Estadu Formasaun Profisionál Empregu (SEFOPE), Rogério de Araujo Mendonça, hateten CAC identifika katak iha má administrasaun iha atribuisaun osan subvensaun ne’ebé SEFOPE halo iha 2019 to’o 2020.
“Nudar membru Governu ba Nuno Governu, ha’u kontente tebes katak ida-ne’e, ita presiza hadia signifika katak fundu ne’ebé mak iha labele haree ba grupu ida-ne’e no ba partidu ida-ne’e inklui ba família ida-ne’e no ida ne’ebá”, nia afirma.
Iha sorin seluk, antigu Sekretáriu Estadu Formasaun Profisionál Empregu, Alarico do Rosario, iha koñesimentu ba orsamentu subvensaun públika iha 2019 no 2020.
“Maibé prosesu sira ne’e kle’ur ona, ne’ebé ha’u ladún lembra, karik CAC konsidera iha má administrasaun iha utilizasaun ba osan subvensaun públika iha momentu ne’ebá, hanesan eis Sekretáriu Estadu SEFOPE no sidadaun ha’u prontu kolabora para hodi hato’o ha’u-nia deklarasaun ba ida-ne’e.
Jornalista: Natalino Costa
Editór : Zezito Silva
