Plural editories husu Governu prodús livru manuál ba ensinu apredizajen
DILI, 05 agostu 2024 (TATOLI) – Empreza Plural Editores husu IX Governu Konstitusionál atu bele kontinua prodús livru manuál ba ensinu aprendizajen iha Timor-Leste.
Diretór Jerál Empreza Plural Editores, Paulo Calhau husu ne’e bainhira hala’o enkontru ho Primeiru-Ministru (PM), Kay Rala Xanana Gusmão iha Palásiu Governu, segunda, ne’e.
Plural Editores observa katak, edukasaun iha Timor-Leste di’ak ona, maibé tenke prodús nafatin livru sira ba ensinu aprendizajen hanesan buat ne’ebé agora daudaun Plural Editores halo liu-hosi produsaun livru ba iha ensinu sira hodi hasa’e koñesimentu estudante Timoroan sira.
“Ita prodús livru oioin bá ensinu aprendizajen mak hanesan manuál eskolar ba setimu to’o nono anu no-mós livru sira ba eskola tékniku vokasionál,” Paulo Calhau hateten.
Iha oportunidade ne’e, aprezenta ba Xefe Governu kona-bá livru tolu ne’ebé mak sei prodús ba Gabinete Primeiru-Ministru mak hanesan livru istória ida, livru fotografia ida no mós livru ida kona-bá diskursu sira Primeiru-Ministru nian.
Plural Editores hanesan editora timorense ida no pretende hanesan referénsia ba edukasaun no kontribuidór valiozu ida ba dezenvolvimentu kulturál Timor-Leste nian.
Prinsípiu no objetivu prinsipál maka halo publikasaun bá matéria sira edukativa no mós tékniku kualidade esepsionál, atu kontribui bá edukasaun ne’ebé di’ak-liu bá jerasaun foun iha futuru.
Plural Editores halo kolaborasaun ho profissionál sira ne’ebé di’ak liu iha seitór ida-ne’e, inklui espesialista no autór sira timoroan nian, ho forma atu garantia publikasaun sira ne’ebé refleta valór no identidade timoroan sira nian, adapta bá realidade no nesesidade professór ho alunu sira.
Plural Editores servisu hamutuk ho Ministériu Edukasaun Timor-Leste nian durante tinan 10 ona.
Jornalista: Hortencio Sanchez
Editór : Florencio Miranda Ximenes
