DILI, 06 agostu 2024 (TATOLI) – Ministru Justisa (MJ), Sergio Hornai, hateten Governu prepara ona bolseiru ho totál 48 atu haruka ba universidade sira iha Portugal ne’ebé antes ne’e Governu halo ona kontatu.
“Governu foin daudaun liuhusi reuniaun Konsellu Ministru kria rejime espesiál bolsu estudu ba setór justisa, hafoin aprovasaun Konsellu Ministru Governu loke konkursu públiku hodi timoroan ne’ebé remata ona sekundária bele konkorre iha vaga ida-ne’e no liuhusi rekrutamentu ida-ne’e, timoroan na’in-48 mak konkorre no agora daudaun rezultadu konkursu taka ona ba públiku”, Sergio Hornai hateten ba jornalista sira hafoin remata enkontru ho kandidatu Majistradu Judisiáriu 24, iha salaun Ministeriu Justisa, tersa, ohin.
Governante ne’e hateten, kandidatu hirak ne’e sei tuir tán teste entervista ne’ebé sei halo husi Gabinete Asesoria Jurídika Primeiru-Ministru.
“Governu sei fó teste ba sira, tanba sira ne’e ita prepara ba longu prazu nia katak sira ne’e sei ba halo estudu iha fakuldade direitu iha universidade Portugal sira, ne’ebé ita-nia Koordenadora Polítika Reforma ba Setór Justisa halo ona kordenasaun”, nia adianta.
Hornai hateten, kuandu ema hirak ne’e mak ba tuir ona teste entervista, posibilidade tinan ne’e sei aranka ba Portugal no ba futuru, sira bele sai lisensiatura direitu.
“Ho ida-ne’e, ita bele hetan Juiz sira, Prokuradór no Defensór Públiku ne’ebé iha koñesimentu ne’ebé di’ak, tantu iha teoria jurídika no ha lian portugés para bele mai fó solusaun ba problema ne’ebé ita hasoru iha ita-nian sosiedade Timor-Leste”, nia konklui.
Jornalista : Natalino Costa
Editór : Zezito Silva
