DILI, 06 Agostu 2024 (TATOLI) – Polísia Nasionál Timor-Leste (PNTL) no ekipa husi International Law Enforcement Academy (ILEA) haosru malu hodi aborda kona-ba formasaun kontínua ba membru polísia sira iha área tráfiku umanu nian.
Komandante Jerál PNTL, Komisáriu Jerál Polísia, Henrique da Costa, haktuir katak prezensa husi delegasaun ILEA nian iha país atu fó apresiasaun ba instituisaun PNTL, tanba membru na’in 250-resin ne’ebé partisipa ona formasaun iha área tráfiku umanu hatudu rezultadu di’ak.
Tanba ne’e, ILEA kontinua husu ba PNTL atu kontinua fó oportunidade ba membru sira bainhira ILEA hato’o pedidu ba komandu PNTL maka bele delega membru sira hodi prepara bá tuir formasaun espesífika ne’e.
“Parseiru sira husi International Law Enforcement Academy, liuhusi sira-nia diretór inklui adjuntu no ekipa sira mai halo enkontru ida ho ita hodi hato’o sira-nia apresiasaun ba membru polísia hamutuk 250-resin iha formasaun espesífika kona-ba tráfiku umanu nian”, Komandante Henrique da Costa hateten iha Kuartél Jerál Caicoli, ohin.
Komisáriu Jerál ne’e haktuir katak delegasaun ILEA hato’o direta mai komandu katak sira halo mós avaliasaun ba membru 250-resin ne’ebé durante iha formasaun hatudu komportamentu di’ak no sira ativu tebes.
Tanba ne’e, ILEA hato’o nafatin pedidu ba instituisaun atu komandu jerál bele fó autorizasaun hodi delega tan nia membru sira hodi partisipa iha formasaun sira, nune’e sira bele hetan koñesimentu adekuadu hodi hala’o serbisu espesifiku sira ba kombate tráfiku umanu iha Timor-Leste.
Iha okaziaun ne’e, komandante jerál sujere ba ILEA katak bainhira kontinua fali formasaun ba membru sira tenke alarga ba área espesífika sira seluk hanesan investigasaun ba droga, lavajen osan, asegura fatin akontesimentu, inklui formasaun ba servisu informasaun polísia nian.
“Ha’u husu ba parseiru sira ne’e atu fó liu tan oportunidade iha área espesífika sira hodi ajuda mós hasa’e koñesimentu membru sira iha departamentu investigasaun nian”, dehan.
Vise-Diretór-Ezekutivu ILEA, Koronel Polísia Kittipon Kaewumporn, relata katak formasaun kona-ba tráfiku umanu ne’ebé ILEA realiza ba membru PNTL 250-resin ne’e, tanba hetan kooperasaun ho Governu Estadu Unidu Amérika (EUA) no Tailándia.
Programa ne’e realiza tanba parte rua entre EUA no Bangekoke fahe área serbisu. Husi Estadu Unidu mak responsabiliza ba planu no programa sira no parte Bangekoke haree liu ba administrativu nian. Formasaun ne’e realiza iha Bangekoke no loke mós ba instituisaun sira seluk ne’ebé iha relasaun serbisu ho parte investigasaun, liuliu kona-ba área tráfiku umanu nian.
Diretór ILEA, Efren Buenrostro, lembra katak fomasaun ne’e realiza dezde 1999, bainhira sira halo kooperasaun ho Governu Tailándia hodi tulun nasaun sira oinsá bele redús kazu tráfiku umanu iha nasaun sira. Husi programa referidu, to’o ohin loron, forma ona ema hamutuk 664.
Efren Buenrostro esplika katak bainhira ema ne’ebé atu bá tuir formasaun iha ILEA tenke liuhusi teste. Ekipa husi ILEA mak sei fó teste no bainhira identifika membru ne’e iha duni koñesimentu di’ak maka foin delega hodi bá tuir formasaun.
Jornalista: Tomé Amado
Editora: Maria Auxiliadora
