DILI, 06 agostu 2024 (TATOLI) – Ministru Justisa (MJ), Sergio Hornai, hateten Governu Timor-Leste halo ona kontratu ho Governu Portugés atu disponibiliza kandidatu majistradu 24 hodi ba kontinua estudu iha Sentru Estudu Judisiáriu Portugal durante tinan ida.
Kandidatu hirak ne’e, kompostu husi kandidatu juiz hamutuk 13, Prokuradór na’in-hitu no Defensór Públiku na’in-haat.
Totál hosi kandidatu hirak ne’e, antes ne’e tuir ona VI formasaun ba majistradu judisiáriu, Juiz, prokuradór no defensór públiku iha Sentru Formasaun Jusrídiku Majistradu Caicoli, iha Teoria ho prátika, iha tinan kotuk.
Tanba ne’e, avaliasaun ne’ebé mak juiz husi Tribunál Judisiál Primeira Instánsia, Prokuradór Jerál Repúblika no Defensór Públiku rekomenda katak kandidatu Majistradu Judisiál sira ne’e admitidu hotu no sira bele tama iha faze tuir mai.
“Neste momentu ita halo hela koordenasaun, ita haruka ona karta ofisiál ba Portugal, Ministériu Justisa Portugal, atu bele haree oinsa mak ita bele admite, ita bele iha kooperasaun ida ho Portugal iha setór justisa nian atu bele hametin ita-nia kooperasaun ho Sentru Estudu Judisiáriu Portugal atu nia bele simu ita-nia kandidatu juiz sira, prokuradór no mós defensór púbkiku hodi ba tuir formasaun sira iha Portugal”, Sergio Hornai hateten ba jornalista sira hafoin enkontru ho kandidatu majistradu sira iha salaun Ministériu Justisa, tersa, ohin.
Nia dehan, Ministériu Justisa, atualmente, hein hela resposta husi Governu Portugal kona-ba formasaun.
Ministru adianta, kandidatu hirak ne’e, sei aranka, posivelmente, tinan ida-ne’e ka tinan oin, depende resposta husi Governu Portugés.
Jornalista: Natalino Costa
Editór : Zezito Silva
