DILI, 07 agostu 2024 (TATOLI)–Autoridade Munisipiu Dili (AMD) identifika vendedór faan ikan hamutuk 32 ne’e hala’o atividade negósiu iha Bebonuk atu muda no halo negósiu faan ikan iha merkadu Manleuana.
Diretór Servisu Munisipál Jestaun Merkadu no Turizmu iha Autoridade Munusipiu Dili, Arthur Henriques, hateten AMD identifika negosiante sira-ne’ebé hala’o atividade negósiu iha área Bebonuk, Pantai Kelapa no Largo Lecidere atu muda merkadu Taibesi no Manleuana.
Arthur Henrique esplika, vendedór sira-ne’ebé uluk muda ba merkadu Taibesi hamutuk 15, maibé iha ema balun fila-fali mai faan ikan iha Lecidere no Bidau ne’e, Governu iha planu ida atu muda hotu sira hala’o negósiu iha merkadu Manleuana.
“Ami iha lista kompletu hotu ona, hein de’it jelera atu muda sira ba iha ne’ebá. Vendedór sira-ne’e, provizoriamente hamutuk ema na’in-32,” Diretór Servisu Munisipál Jestaun Merkadu no Turizmu iha Autoridade Munusipiu Dili, Arthur Henriques, hateten ba Agência Tatoli, liuhusi telefónika, tersa ne’e.
Iha merkadu Manleuana, nia dehan, ba vendedór sira-ne’e fatin ba faan ikan no naan preparadu hotu ona, atu nune’e vendedór sira bele hala’o atividade negósiu.
“Konstrusaun hotu ona no hein de’it mak ekipamentu sira hanesan jelera hodi bele tau iha fatin faan ikan no naan nian ba vendedor sira hodi muda sira ba iha ne’ebá,” nia hateten.
Nia esplika, presiza duni ekipamentu sira hanesan jelera atu negosiantes sira bele rai sira-nia produtu sira, bainhira sira faan mak la hotu ka sosa hotu ne’e bele konserva.
Jornalista : Jesuína Xavier
Editór : Cancio Ximenes
