DILI, 07 agostu 2024 (TATOLI) – Membru Polísia Nasionál Timor-Leste husi Unidade Polísia Marítima (UPM) na’in-hitu ne’ebé hetan bolsa estudu, balun sei aranka iha 11 agostu no balun sei kotinua husik Timor-Leste iha 3 setembru, hodi ba estuda iha Universidade Politeknik Perkapalan Surabaya no Universidade Internasionál Japaun.
Membru PNTL hirak ne’e, nai’in-neen husi Unidade Polísia Marítima no na’in ida mk husi Komandu Jerál PNTL. Hirak ne’e hanesan Ajente Prinsipál Joanico Ximenes, Ajente Prinsipál, Julio da Costa Ximenes, Ajente Prinsipál Rodolfo Alfa Gonçalves, Ajente Prinsipál Aquelino Ribeiro no Ajente Prinsipál Joanico Ximenes sei halo estudu iha tékniku eletrisista iha Universidade Politékniku Surabaya, Ajente Prinsipál Adilson dos Santos no Ajente Prinsipál Octavio Alfredo ba halo estudu kona-ba jestaun ba ró.
Primeiru Serjentu José Manuel Gomes, sei ba halo estudu iha universidade internasionál Japaun iha área relasaun internasionál. Membru PNTL na’in-hotu ne’e balun halo estudu ho durasaun tinan lima.
Komandante Jerál PNTL Komisáriu Jerál Polísia Henrique da Costa, hateten membru PNTL husi Unidade Polísia Marítima, iha tinan ne’e, na’in-neen hetan bolsu estudu ba eskola iha Politeknik Perkapalan Surabaya no PNTL ba eskola iha universidade Japaun.
“Universidade sira ne’ebé membru na’in-hitu atu ba ne’e haree katak sira priénse duni rekezitu, tanba ne’e universidade sira ne’e simu membru na’in-hitu hodi ba eskola iha sira-nia universidade”, Henrique da Costa hateten ba jotnalista sira bainhira despede membru PNTL sira atu ba eskola iha rai li’ur, iha Kuartel UPM Lecidere, kuarta, ohin.
Nia dehan, Komandu PNTL kompromentidu hodi investe iha rekursu umanu hodi dezenvolve instituisaun PNTL ba futuru ho di’ak liután.
“Oportunidade ne’e loke ba membru PNTL hotu maibé sira na’in-hitu mak selesionadu, Komandu sei loke nafatin oportunidade ba membru PNTL hotu, tanba ita-nia Governu estabelese ona akordu ho universidade sira ne’e, tanba ne’e oportunidade sei kontinua nafatin”, nia adianta.
Iha fatin hanesan, Koamandante Unidade Polísia Marítima (UPM), Superintendente Polísia Eugenio Pereira, rekorda katak membru PNTL na’in-hitu konkore bolsu estudu iha tinan kotuk.
“Sira konkore bolsu estudu ne’e iha tinan kotuk no sira na’in-hitu hitu mak pasa iha bolsu estudu, balun sei ba halo estudu durante tinan haat no balun tinan lima tanba depende ba sira-nia área estudu”, nia konklui
Jornalista: Natalino Costa
Editór : Zezito Silva
