LOSPALOS, 08 agostu 2024 (TATOLI)– Eskola Ensinu Báziku filiál 1a, 2a no 3a nebe’é lokaliza iha Aldeia Somocho, suku Bauro,Postu Administrativu Lospalos, Munisípiu Lautem, menús profesór nune’e profesora ida de’it mak hanorin estudante hamutuk 57.
“Ami nia eskola antes ne’e iha profesór rua mak hanorin, maibé iha fulan hirak liu ba profesór ida reforma tiha,Nune’e daudaun ha’u mesak mak hanorin estudante iha 1a 2a no 3a hamutuk aula tolu ho estudante 57,“ hateten Profesora Marejina dos Santos iha EBF Somocho
Nia hatutan bainhira partisipia enkontru ruma iha Munisípiu no ba nasionál tenke abandona labarik sira labele partisipa prosesu Aprendizajen tanba laiha profesor seluk hodi prenxe Aula.
“Bainhira ba partisipa enkontru ruma ka formasaun sira labarik sira ha’u tenke abandona tanba laiha profesór ida atu subtitui, nune’e dalaruma sira tenke halimar de’it to’o fila ba uma,” katak.
Nia afirma tan ho rekrutamentu bolsa kandidatu ne’ebé antes ne’e halo husi Ministériu Edukasaun atu koloka iha eskola referidu hamutuk professor tolu maibe to’a agora seidauk prezente.
Iha sorin seluk, Xefe Suku Bauro,Postu Administrativu Lospalos, Florindo Miranda rekoñese falta duni rekursu umanu liuliu profesor iha eskola sira iha nia suku laran mak hanesan (Eskola Báziku Filiál), EBF Keri Laran Sabalai no EBF Somocho.
“Eskola sira iha suku laran mak hanesan eskola Keri Laran Sabalai no Eskola Filial Somocho menus profesor hanesan iha EBF Keri Laran Sabalai Professor 4 no Eskola EBF Somocho profesor Ida de’it, nune’e defikulta estudante sira partisipa ativu iha prosesu aprendizajen,” hateten Xefe suku ne’e
Autoridade lokál ne’e afirma tan sira servisu hamutuk ho Profesor sira relata ona ba Autoridade kompotente, maibé seidauk iha solusiona.
Entertantu eskola báziku Filiál Somocho iha totál estudante hamutuk 57 no profesora ida de’it.
Jornalista : Anito Soares
Editór : Florencio Miranda Ximenes
