DILI, 09 Agustu 2024 (TATOLI) – Xefe suku Madohi, Bernardino de Cristo Ferreira, husu populasaun atu iha nasionalismu hodi envolve aan iha komemorasaun loron konsulta popular 30 Agustu, tanba nu’udar loron istoriku ba povu timoroan hotu ne’ebé hakarak determina ninia autodeterminasaun ba ukun rasik aan.
Nia explika Governu presiza halo edukasaun sivika ba nia populasaun hodi hatene konaba loron importante sira hanesan ne’e, tanba ida ne’e loron ne’ebé povu Timor-Leste hasoru sofrimente.
“Governu nia programa ba komemorasaun loron 30 Agustu ne’e envolvimentu povu nian ne’e laiha. Governu tenki fó espasu ida ba edukasaun sivika hodi sai ema hotu sai sidadaun nasionalista. Povu nia partisipasaun ne’e menus liu”, Xefe suku Madohi, Bernardino de Cristo Ferreira, ba Tatoli ia sede suku Madohi.
Nia reforsa buat hotu ne’ebé pertense nasaun no Estadu pertense ba povu, tanba ne’e mak Governu hanesan ezekutor atu kria polítika ida hodi bele iha envolvimentu povu nian iha laran ba loron bo’ot.
Tuir nia sidadaun barak laiha koñesimentu no sentimentu ida nu’udar sidadaun ida pertense Estadu, tanba ladun iha envolvimentu di’ak ba loron sira ne’e.
Autoridade lokal ne’e hateten se sidadaun laiha sentidu ba nasionalismu bele kria problema iha sosiedade no hatudu hahalok ladi’ak.
Xefe suku mos husu ba jovens sira kria unidade iha iha idaidak nia suku atu bele kontribui ba dezenvolvimentu nasionál liuhosi dame.
Jornalista: Jesuína Xavier
Editor: Cancio Ximenes
