DILI, 12 agostu 2024 (TATOLI) – Prezidente Tribunál Rekursu (PTR), Deolindo dos Santos, hateten Empreza China International Economic Corperation Group Co Ltd konklui ona prosesu konstrusaun ba edifísiu Tribunál Judisiál Primeira Instánsia Dili.
“Edifísiu Tribunál Judisiál Primeira Instánsia Dili empreza konklui ona ninia konstrusaun, maibé seidauk entrega, tanba iha buat balun mak empreza hakarak hadia molok entraga ofisiál ba Governu”, Deolindo dos Santos, dehan ba jornalista sira iha Tribunál Rekursu Caicoli, segunda, ohin.
Nia dehan, buat balun ne’ebé sei falta mak letra iha edifísiu balun mak seidauk kompletu no estrada ida atu tama ba aredór edifísiu Tribunál nian mak seidauk di’ak tanba ne’e mak empreza esforsu hodi kompleta kestaun hirak ne’e mak foin entrega.
“Ha’u sei bolu, ami koalia ida hodi nune’e empreza bele aselera prosesu ida-ne’e, atu nune’e depois ferias judisiáriu, ita bele inagura no kuandu igarura ona edifísiu Tribunál Judisiál Primeira Instánsia Dili ita uza kedas”, nia adianta.
Deolindo hateten, esforsu sira ne’e depende ba empreza konstrutór tanba kuandu esforsu sira ne’e tuir duni planu ne’ebé mak iha, entaun edifísiu foun ba Tribunál sei uza tuir nia tempu.
“Ha’u labele koalia dehan edifísiu Tribunál Dili sei inagura iha fulan ida-ne’e ka fulan oin tanba iha posibilidade hanesan ha’u dehan ne’e, ita halo esforsu hotu atu konklui iha fulan ida-ne’e. Maibé buat sira ne’e hotu lao normál entaun ita bele uza ona fain ne’ebá. Mas kuandu buat hotu la’o la tuir nia tarjeitu, entaun ita sei hanoin fali bainhira mak atu servisu iha sorin”, nia afirma.
Prezidente Tribunál subliña, sasan sira iha edifísiu tuan, Tribunál Judisiál Primeira Instánsia Dili Mandarin lori hotu ona mai iha edifísiu foun Tribunál Dili.
“Só sistema sira mak ita seidauk muda husi edifísiu tuan ba edifísiu foun tanba hanesan ohin ha’u dehan kuandu empreza seidauk hadia buat sira ne’ebé ita dehan ne’e, ita seidauk bele lori ba monta. Maibé kuandu empreza konklui ona prosesu konstrusaun mak ita foin lori sistema sira ne’e ba monta iha ne’ebá para Juiz sira bele halo ona servisu iha ne’ebá no julgamentu bele halo iha edifísiu Tribunál foun”, nia dehan.
Jornalista: Natalino Costa
Editór : Zezito Silva
