DILI, 12 agostu 2024 (TATOLI)– Diretór Ezekutivu Millenium Challeng Compact Timor-Leste (MCC-TL), Embaixador, Constâncio da Conceição Pinto, informa, Governu aprova ona osan hamutuk millaun $7 hodi fó indemnizasaun ba okupante ho uma-kain 12 iha Bebonuk ne’ebé afetadu hodi konstrui ba projetu MCC.
]”Kona-ba projetu dahuluk Ministériu Justisa, liuhusi Sekretáriu Estadu Terra no Propriedade, sei disponibiliza osan millaun $7 ba família 12 ka okupante sira iha Bebonuk, selu kompensasaun ba na’in ba rai, edifisiu no patrimoniu ne’ebé pertense ba familia ka okupante 12 ne’e”, katak Constâncio ba Ajensia TATOLI,I.P iha edifisiu Ministériu Finansas, Aitarak-Laran, segunda ne’e.
Notisia relevante:KM aprova rezolusaun autoriza MJ halo negosiasaun-akizasaun rai iha Bebonuk ba projetu MCA
Bainhira pagamentu hotu ona, nia dehan Ministériu Justisa sei entrega dala ida tan rai ne’e ba kompañia BTL, E.P, nu’udar na’in ba projetu, nune’e bele sobu fatin ne’e no hahú konstrusaun.
Empreza Nicholas O’Dwyer no konsultór enjeñaria no ambientál ida husi Irlanda sei hala’o, iha fulan-novembru oin-mai, tanba estudu jeotékniku ida hodi kontrola kondisaun rai nian no garante estabilidade konstrusaun nian.
Governu Timor-Leste ho ajénsia Governu Norte-Amerikanu liuhusi Millenium Challenge Compact (MCC) asina iha tinan 2022 akordu ida hodi implementa paktu kooperasaun ba programa tinan lima ho montante millaun $484 dolar amerikanu.
Tuir mai, Projetu MCC rezulta husi akordu ne’ebé asina entre Ezekutivu na’in-rua, Timor-oan no Norte-Amerikanu, no husi ne’ebé Governu Timor-oan aprova kriasaun Institutu Públiku ida, Millennium Challenge Account-Timor-Leste (MCA-TL) , hodi jere fundu sira ne’ebé maka fó husi ajénsia governu Amerikanu MCC.
Investimentu ne’e ho intensaun atu foka ba projetu rua ne’ebé konsidera esensiál: ida atu hadi’a sistema bee, saneamentu no drenajen no ida seluk iha área edukasaun no formasaun.
Ida uluk sei inklui tratamentu bee, sistema sira bee-moos no drenajen nian, hametin kapasidade instituisaun sira no órgaun reguladór sira-nian, no kria fornesimentu bee no sistema bee-moos nian ne’ebé efetivu ba uzu doméstiku.
Segundu sei inklui Sentru Exelénsia Foun ba formasaun ba profesór sira ne’ebé sei garante kualidade no padraun lideransa ba ajente edukasionál sira.
Notisia relevante:PARTE III: DEZENVOLVIMENTU SUSTENTÁVEL: Ba Kompreende Polítika Husi MCC iha Nasaun Terseiru Mundu: Estudu Kazu Kona-ba Nepal no Timor-Leste
Jornalista: Hortencio Sanchez
Editór: Florencio Miranda Ximenes
