DILI, 09 agostu 2024 (TATOLI) – Prezidente Tribunál Rekursu, Deolindo dos Santos, dehan Konsellu Superiór Majistratura Judisáriu deside hodi supende preventivamente hasoru Juiz ho inisiál DT tanba suspeita prátika iha kazu koasaun seksauál.
“Ha’u atu dehan katak konsellu ho nia kompeténsia tomak hodi foti ona desizaun iha segunda semana kotuk hodi deside halo suspensaun preventiva ba kolega Juiz ida ne’ebé servisu iha Tribunál Rekursu. Tanba nia nudar autór ne’ebé deskonfia ba faktu ne’ebé foin daudaun virál ona iha semana kotuk”, Deolindo hateten ba jornalista sira iha Tribunál Rekursu, Caicoli, ohin.
Deolindo revela katak Prezidente Konsellu Superiór Majistratura Judisiariu, lei la fó atu koalia buat ruma sobre kazu ne’e, tanba autór ne’ebé envolve iha kazu ne’e konsellu deside halo ona suspensaun ba nia.
“Ha’u labele pronúnsia buat ida katak kazu ne’e atu akontese iha Tribunál Rekursu ka lae, ha’u labele koalia, tanba kazu ne’e iha hela prosesu no ita bo’ot sira hatene autór rasik, Konsellu Superiór Majistratura Judisiáriu deside halo suspensaun preventiva ba nia, signifika Juiz ne’e labele halo ona servisu hanesan Juiz”, nia adianta.
Nia hateten, suspensaun preventiva ne’ebé mak Konsellu halo hodi hasoru Juiz DT, laiha prazu.
“Ha’u hanoin suspensaun preventiva ne’e laiha prazu tanba suspensaun ida-ne’e ninia kazu sei lao nafatin, maibé kuandu prosesu ne’e konklui ona mak konsellu sei foti desizaun definitiva katak desizaun atu sai oinsa, ida-ne’e kompeténsia konsellu”, nia afirma.
Rekorda fali fali katak Juiz Konselleiru Tribunál Rekursu ho insiál DT, envolve kazu koasaun seksuál ne’e iha fulan ida-ne’e, bainhira DT telefone ba nia estudante feto ida husi Universidade da Paz (UNPAZ) atu lori nia monografia ba Tribunál Rekursu atu orienta, maibé iha prosesu ne’e, deskonfia DT kaer fali estudante refere nia parte sensitivu, nune’e kazu ne’e virál ona iha rede sosiál, ho nune’e mak iha segunda (5/8) semana kotuk, Konsellu Superiór Majistratura Judisiáriu deside suspende ona Juiz DT tanba hahalok ne’ebé Juiz komete iha Tribunál Rekursu.
Jornalista: Natalino Costa
Editór : Zezito Silva
