DILI, 13 agostu 2024 (TATOLI)–Tékniku Eletrisidade de Timor-Leste Empreza Públika (EDTL, E.P) hahú instala liña eletrisidade ba iha área Tasi-Tolu hanesan preparasaun ba misa solene ne’ebé Papa Francisco prezide iha loron 10 setembru 2024, iha tuku 16h30 lorokraik.
Tekniku EDTL Anselmo dos Santos, esplika EDTL hahú instalasaun hodi hadia liña eletrisidade husi rotunda Prezidente Nicolau Lobato Comoro to’o iha Tasi-Tolu, liliu hasai distribuisaun liña eletrisidade ne’ebé la serve ona atu uza, sira troka hotu kedas hanesan fiu no riin eletrika sira troka hotu.
“Ami haree ida-ne’ebé aat, ami troka hotu fiu foun. Instalasaun sira-ne’ebé mak ami halo mak hanesan riin eletrisidade no fiu sira-ne’ebé ami komesa troka hosi rotunda Comoro mai to’o iha ne’e, ami lubuk ida mak ami troka. Sei troka painel no asesór sira eletrisidade nian no sei avalia hodi bele halo reparasaun. Atu preparasaun ba selebrasaun misa amu Papa nian mai ne’e labele iha fallaansu ba fornesimentu enerjia eletrika iha area Tasi-Tolu,” Anselmo dos Santos hateten ba Agência TATOLI, iha Tasi-Tolu.
Tékniku dehan, kada trafo foun iha kapasidade iha 350 KW ne’ebé EDTL instala iha área Tasi-Tolu nian.
Profisionál EDTL ne’e relembra, tékniku sira hahu intalasaun iha fulan haat liuba no sei termina iha fulan ida-ne’e nia rohan.
Jornalista : Jesuína Xavier
Editór : Cancio Ximenes
