Akadémiku sujere Governu kontrola xineza loke loja to’o área rurál

DILI, 14 agostu 2024 (TATOLI)–Reitór Dili Institute Of Technlogy (DIT), Salustiano dos Reis Piedade, sujere ba Governu atu kontrola xineza ne’ebé loke loja to’o área rurál.

“Saida mak ita haree iha ita-nia rain mak hahú xineza dominan iha ita-nia rain ne’e hanesan triste boot ida. Tanba tuir loloos buat négosiu kiik ita timoroan mak halo, xineza sira mai ne’e investe ba buat boot. La’ós mai fa’an pulsa, bakso, supremie, ida-ne’e la tulun ita no nia konsekuénsia mak ita-nia aprovasaun orsamentu ne’e ba hotu rai-li’ur. Osan sira-nia la sirkula iha Timor-Leste, tanba timoroan la halo buat ida. Négosiu ne’ebé halo ne’e xineza halo hotu ona,” Reitór hateten ba Agência Tatoli, iha ninia knaar fatin, DIT, kuarta ne’e.

Notísia relevante : Membru PN husu Governu kontrola xineza halo atividade negosiu to’o munisipiu

Nia dehan, maski ukun rasik-an ona maibé povu seidauk hetan independénsia loloos tanba domina ho xineza ne’ebé mai fa’an hahú husi nesesidade bázika to’o sásan boot sira.

“Ita-nia kbiit mak loke kioske sira-ne’e maibé sira mai loke hotu,” nia akresenta.

Nune’e, nia husu Governu atu kria lei ida kona-ba investimentu ba sásan boot sira tanba presiza mak baze legál ida nune’e bele regula.

“Aleinde ne’e bele separa fa’an sásan kiik no boot. Xineza sira bele drop sasán boot mai tau iha fatin ida mak timoroan sosa mak fa’an tutan. Ita husu tebes ita-nia Governu halo regulamentu rigór ida nune’e bele fó oportunidade ba ita-nia joven timoroan hodi bele moris no sustenta moris,” nia tenik.

Nune’e mós, Prezidente Institutu Politékniku Betano (IPB), Acácio Cardoso Amaral, hateten, Governu tenke kria lei nune’e bele regula tanba balun ne’ebé osan laiha mós fa’an.

“Tuir hau-nia haree ba xineza fa’an sásan ne’ebé kiik, entaun timoroan mós bele hela, agora solusaun mak Governu tenke kria lei ka regulamentu nune’e bele regula ema ida ne’ebé halo négosiu,” nia sujere.

Jornalista     : Osória Marques

Editora          : Julia Chatarina