DILI, 14 agostu 2024 (TATOLI) – Komandante Komandu Pesoál no Formasaun Komandu Jerál Polísia Nasionál Timor-Leste (PNTL), Superintendente Xefe Polísia, Arquimino Ramos, hateten Komandu PNTL forma ona komisaun instaladora ba kriasaun Institutu Ensinu Superiór Siénsia Polísia (IESSPol) iha Timor-Leste.
Nia dehan, Institutu Ensinu Superiór Siénsia Polísia ne’e kria bazeia ba lei estatutu orgániku foun PNTL iha ne’ebé autoriza, ba futuru tenke iha Ensinu Superiór Siénsia Polísia.
“Ita-nia estatutu no lei orgánika foun Polísia Nasionál Timor-Leste mak define katak ita tenke iha Institutu Ensinu Superiór Siénsia Polísia no Akademia Polísia. Tanba ne’e, Komandu PNTL deside instala komisaun ida-ne’e hodi haree ba kestaun ne’e”, Ramos, hateten ba jornalista sira hafoin reuniaun ho Segundu Komandante Jerál PNTL Komisáriu Polísia Pedro Belo iha Sentru Formasun Polísia, Comoro, kuarta, ohin.
Nia dehan, komisaun instaladora, kompostu husi Prezidente Komisaun Superintendente Xefe Polísia, Arquimino Ramos, Vise Prezidente Komandante Sentru Formasaun Polísia (CFP, sigla portugés) Interinu Superintendente Asistente Polísia Basílio de Jesus, Xefe Departamentu Infomasaun Formasaun Komandu Jerál PNTL no hetan apoiu husi Timor-Leste Police Development Program (TLPDP) Austrália.
Arquimino hateten, ekipa agora dadaun halo hela esforsu hodi kompleta kritériu ne’ebé Ministeriu Ensinu Superiór Siénsia no Kultura (MESSK) ba Komandu PNTL atu kompleta molok ba kriasaun Institutu Ensinu Superiór Siénsia Polísia.
Nia esplika, kritériu ne’ebé maka MSSK fó ba Polísia kona-ba kriasaun Institutu Ensinu Supriór Siénsia Polísia mak iha kritériu 11. Husi kritériu 11 ne’e, ida mak misaun no vizaun Institutu Ensinu Superiór Siénsia Polísia, kritériu ida mak planu prioridade IESSPol ba tinan lima, kritériu ida seluk mak infraestrutura, liuliu aula aprendizajen, fasilidade dormitóriu inklui fatin ba desportu no rekursu umanu.
“Rekursu umanu ita garante no ita iha fatin hafoin ita uza edifísiu Sentru Formasaun Polísia ba Institutu Ensinu Superiór Siénsia Polísia. tanba Sentru Formasaun Polísia ne’e akreditadu husi Ajénsia Nasionál Akreditasaun Akadémika iha tinan rua liu ba. Kritériu hirak ne’e Komandu PNTL priénse ona, maibé kritériu rua importante mak Komandu PNTL seidauk priense”, nia adianta.
Nia dehan, kritériu rua mak autonomia finaseira no sustentabilidade ba Institutu Ensinu Superiór Siénsia Polísia. Tanba tuir lei orgánika no estatutu PNTL hateten katak kriasaun ba Institutu Ensinu Superiór Siénsia Polísia ne’e tenke goza nia autonomia finanseira no institute ne’e tenke garante ninia sustentabilidade.
“Kuandu Institutu Ensinu Superiór Siénsia Polísia ne’e lao tinan rua mak laiha nia sustentabilidade katak laiha formasaun kontinuasaun mak Ministériu Ensinu Superiór bele anula ninia ezisténsia”, nia afirma.
Komandante Arquimino hareten, ekipa halo enkontru ho Komandante Jerál PNTL no Segundu Komandante Jerál PNTL atu koalia kona-ba kestaun sira, molok ekipa submete kritériu sira ne’e ba Ministériu Ensinu Superiór Siénsia no Kultura.
“Ministériu Ensinu Superiór Siénsia no Kultura fó tempu to’o de’it fulan-agostu tanba ne’e ohin ita realiza enkontru ho Komandante Jerál PNTL no Segundu Komandante Jerál PNTL para sira aprova tiha kritériu rua ne’ebé ita koalia hela atu nune’e molok agostu atu ekipa submete ona kritériu sira ne’e Ministru Ensinu Superiór halo verifikasaun”, nia informa.
Nia dehan, Institutu Ensinu Superiór Siénsia Polísia ne’e nudar instutitu ida ne’ebé mak atu hanorin polísia sira liliu iha nivél institutu ensinu superiór ne’ebé liga ba siénsia polísia nian.
Jornalista: Natalino Costa
Editór : Zezito Silva
