MJ rekoñese kazu barak la’o lentu iha tribunál tanba númeru Juiz mínimu

DILI, 14 agostu 2024 (TATOLI) – Ministru Justisa (MJ), Sergio Hornai, rekoñese daudaun ne’e númeru Juiz iha Tribunál sira menus fó impaktu ba servisu Tribunál atu halo julgamentu ba kazu sira.
“Ita rekoñese Juiz agora ne’e iha númeru ida ne’ebé uitoan loos, kazu barak mak pendente hela, Governu haree hela oinsa fó solusaun ba ida ne’e,” Ministru ne’e dehan ba jornalista sira iha Palásiu Governu Dili, kuarta ne’e.
Nia dehan, maibé solusaun ne’ebé daudaun ne’e Governu foti mak fó hela formasaun ba Juiz, prokuradór, defensór públiku, nune’e bele iha koñesimentu no kbi’it tékniku juridiku atubele halo servisu ba iha ba problema ne’ebé daudaun ne’e Tribunál hasoru.
“Objetivu prinsipál husi polítika ida ne’e mak atu halo koordenasaun atu servisu sira bele la’o ho integradu, programa sira, ita hakarak, Governu hakarak, instituisaun hakarak bele iha artikulasaun ka senerjia, entre ida ba ida seluk,” Ministru ne’e tenik.
Daudaun ne’e, Tribunál iha Timor-Leste hamutuk lima mak hanesan, Tribunál Primeira Instánsia Dili, Baucau, Covalima, no Oé-Cusse no Tribunál Segundu Instansia.
Númeru Juiz ne’ebé ativu halo hela servisu iha Tribunál lima ne’e na’in-34, husi númeru ne’e na’in-rua rejigna-aan ona no efetivu iha Tribunál lima ne’e hamutuk na’in-27 no Juiz konselleiru na’in-haat.
Jornalista: Hortencio Sanchez
Editór: Florencio Miranda Ximenes

