DILI, 14 agostu 2024 (TATOLI) – Komandante Komandu Pesoál no Formasaun Komandu Jerál Polísia Nasionál Timor-Leste (PNTL), Superintendente Xefe Polísia, Arquimino Ramos, dehan Komandu PNTL prepara membru 27 hodi ba partisipa iha Misaun Pás ONU iha Sudaun Súl.
“Sim, komandu prepara hela membru na’in-27 atu ba partisipa iha Misaun Pás ONU iha Sudaun Súl”, Arquimino Ramos, hateten ba jornalista sira hafoin reuniaun ho Segundu Komandante Jerál PNTL Komisáriu Polísia Pedro Belo iha Sentru Formasun Polísia, Comoro, kuarta, ohin.
Nia subliña, membru PNTL hamutuk 27, partisipa ona formasaun sira hanesan teste ba lian inglés, oinsá lori karreta ho di’ak no tiru.
“Formasaun ne’ebé ita halo foin daudaun ba ita-nia membru sira ne’e mak ba liu iha área lingua inglés, portugés, abilidade ba lori karreta no abilidade ba tiru”, nia adianta.
Arquimino hateten, Komandu PNTL, daudaun ne’e, prepara hela nia membru nai’in 27, kuandu iha vaga ba Misaun Pás ONU iha Sudaun Súl, entaun Komandu PNTL sei haruka sira ne’e ba kumpre Misaun Pás ONU.
Nia dehan, membru hirak ne’e, antes atu aranka tenke kumpre Misaun ONU iha Sudaun Súl, ekipa ONU husi Nova Yorke sei halo tán teste inglés no abilidade sira seluk hanesan lori karreta no tiru inklui mós operasaun sira.
“Ita agradese no orgullu ba ita-nia membru PNTL tanba ezisténsia PNTL iha membru hamutuk 18 mak partisipa ona Misaun Pás ONU”, nia konklui.
Jornalista: Natalino Costa
Editór : Zezito Silva
