DILI, 17 agostu 2024 (TATOLI)—Manorin lian Koreia husi Kursu Lian Koreia Espesiál (KLKE), Hipólito Saldanha Vieira Branco, reprezenta Timor-Leste iha kompetisaun diskursu lian Koreia 2024 ka ‘K-Speech 2024’, okupa primeiru lugár hasoru nasaun 32, iha sidade Vientiane, Laos, iha sesta (16/08).
Ba vitória ne’e, Hipólito hetan prémiu hanaran Minister’s Award.
“Timor-Leste sente orgullu ho Hipólito, manorin lian Koreia husi Kursu Lian Koreia Espesiál, ne’ebé reprezenta Timor-Leste iha kompetisaun diskursu lian Koreia 2024 ne’ebé hala’o iha Vientiane, Laos. Eventu prestíjiu ne’e organiza hodi promove lian Koreia no troka kultura, fó oportunidade ba ko’alia lian Koreia no talentu husi nasaun oin-oin hodi hatudu abilidade iha lian Koreia,” refere nota ne’ebé Agência Tatoli asesu, sábadu ne’e.
Molok halo viajen ba nasaun Laos, Hipólito hasoru malu ho Embaixadór Koreia iha Timor-Leste iha Dili, hodi informa kona-ba nia partisipasaun iha K-Speech 2024.
Embaixadór Koreia iha momentu ne’ebá hatudu apoiu forte ba Hipólito nia esforsu nomós partisipa iha eventu ne’e no konsidera hatudu ligasaun forte ne’ebé eziste entre Timor-Leste no Koreia iha área edukasaun no kultura.
“Eventu ne’e mak momentu importante ida, la’ós de’it ba nia-an mesak maibé mós lori Timor-Leste nia naran. Ne’e hatudu katak Timor-Leste agora hahú envolve iha eventu kultura sira iha nível internasionál,” Embaixadór tenik.
Diplomata ne’e konsidera, Hipólito ninia partisipasaun iha Laos tuir diskursu lian Koreia ne’e refleta nia kompreensaun profundu kona-ba lian no kultura Koreia.
Notísia relevante : Adidu na’in-rua iha Koreia sei kontrola traballadór timoroan sai husi sistema
Kompetisaun ne’e nu’udár eventu anuál ne’ebé atrai partisipante husi nasaun oin-oin hanesan Austrália, Tailándia, Vietname, no seluk tan ho abilidade linguístika nomós hanoin kona-ba kultura no lian Koreia.
Envolvimentu Hipólito, hanesan manorin lian Koreia iha KLKE ne’e hatudu katak iha interrese iha Timor-Leste kona-ba kultura no lian Koreia, ne’ebé mosu iha tendénsia globál ida.
“Ohin Hipólito iha Vientiane Laos, nia lori esperansa husi Timor-Leste nian hodi hatudu kompromisu, troka kultura no amizade internasionál. Diskursu nia sei kontribui ba diálogu ida-ne’ebé sei forte ba ligasaun Timor-Leste no Koreia, nomós sei halo ligasaun ne’ebé forte tebes,” Embaixadór katak.
Konkursu ne’ebé hala’o iha sidade Vibrante Vientiane, ne’e hanesan eventu kompetitivu ida, ho partisipante sira hala’o diskursu kona-ba tema diversu sira hotu, hotu-hotu iha lian Koreia no Hipólito sei diskursu ho Topiku “By Quantum Physics: the Korean Language Venture“.
Prezensa Hipólito iha kompetisaun ida-ne’e sai hanesan testemuña husi nia esforsu maka’as nomós suporta ne’ebé nia simu husi nia mestre sira, komunidade nomós povu Timor-Leste no Koreia.
Timor-Leste orgullu ho Hipólito tanba nia konsege partisipa no iha esperansa katak nia susessu iha Kompetisaun Diskursu Lian Korea 2024. Nia partisipasaun la’ós de’it aumenta prezensa Timor-Leste iha nível internasionál maibé mós inspira ema barak iha Timor-Leste atu kontinua estuda lian Koreia no envolve-an iha kultura oin-oin.
Jornalista : Hortencio Sanchez
Editora : Julia Chatarina
