Estudante universitáriu kontinua preokupa ho setór edukasaun, saúde, no agrikultura
DILI, 19 agostu 2024 (TATOLI)—Estudante universitáriu kontinua preokupa ho setór edukasaun, saúde no agrikultura iha Timor-Leste, tanba ne’e presiza tau atensaun.
Estudante husi Universidade Dili (UNDIL), Remilda Pereira, hateten, Governu presiza rezolve setór sira ne’ebé importante iha rai-laran nune’e ema hotu bele konsiente katak dezenvolvimentu ne’e iha duni ba Timor-Leste hafoin independénsia.
“Tanba ita ukun-an ona mós to’o agora ema barak seidauk sente dezenvolvimentu ne’e iha ita-nia rai tanba edukasaun no saúde nafatin iha problema, oinsá mak ita bele garante katak Timor-Leste ne’e sei iha dezenvolvimentu se kuantu dalan ba dezenvolvimentu ne’e mak edukasaun maibé ita-nia Governu la tau atensaun ba ida-ne’e. Ita-nia povu tenke moris saudável tanba ne’e Governu tenke tau atensaun maka’as mós ba iha parte saúde,” Remilda Pereira dehan iha resintu UNDIL, segunda ne’e.
Notísia relevante : Estudante UNTL iha Hera preokupa edifísiu laiha morru
Nia husu Governu atu dezenvolve agrikultura nune’e bele garante kresimentu ekonomia.
“Tanba durante ne’e ita garante liu ba importasaun husi rai-li’ur, ne’ebé dalan di’ak liu ne’e mak tenke tau atensaun mós ba iha parte agrikultura,” nia akresenta.
Nune’e mós, estudante Universidade Nasionál Timor-Lorosa’e (UNTL), Ana Ximenes, hateten, edukasaun mak dalan ne’ebé úniku ba dezenvolvimentu nasaun ida nian, tanba liuhusi edukasaun mak prodús rekursu umanu ne’ebé kualidade hodi bele halo dezenvolvimentu.
“Edukasaun mak dalan importante oinsá mak prodús rekursu umanu ne’ebé mak sai kualifikadu hodi sai ema ne’ebé mak intelektuál atu prepara sira ba iha futuru. Governu mós presiza kria infraestrutura báziku sira husi nível lokál to’o nível nasionál maibé ida-ne’ebé mak imporatante liu mak setór edukasaun, saúde no agrikultor,” nia tenik.
Tuir estudante ne’e, Governu tenke tau orsamentu boot ba setór edukasaun tanba edukasaun mak bele eleva kapasidade estudante no sai kualifikadu hodi lori Timor ne’e ba naroman. Nune’e mós, Governu tenke foku ba setór agrikultura iha rai-laran no dezenvolve setór privadu sira atu nune’e garante ekonomia rai-laran ho di’ak.
“Nasaun ne’ebé mak atu dezenvolve ne’e iha fatór tolu mak hanesan dezenvolvimentu adiantadu, dezenvolvimentu subdezenvolvidu no dezenvolvimentu avansadu, ne’ebé daudaun ne’e ita hasoru dezenolvimentu adiantadu tanba ita-nia nasaun foin mak hamriik iha pós konflitu, entaun primeiru Governu tenke tau atensaun ba setór agrikultór tanba setór agrikultor mak oinsé prodús produsaun iha ita-nia rai-laran atu oinsá mak ita hetan rendimentu ne’ebé mak di’ak,” nia hato’o.
Estudante husi Universidade da Paz (UNPAZ), João Adelaide, husu ba Governu tenke tau atensaun maka’as ba iha edukasaun, saúde no agrikultura.
“Tanba liuhusi edukasaun mak forma ema-nia kapasidade no mentalidade hodi hamriik halo serbisu ho nia matenek ne’ebé nia iha atu dezenvolve nasaun ida. Saúde ne’e importante tebes tanba ita prodús ema matenek barak atu dezenvolve nasaun ida ne’e maibé kuandu problema iha setór saude ne’e defisil, nune’e mós agrikultura, se ita la tau-atensaun ba iha agrikultura no ita nafatin kesi an ba importasaun husi rai-li’ur ne’e ita mak nafatin de’it iha fatin.
Nune’e, biban ne’e estudante universitáriu ne’e sujere atu Governu atu tau atensaun másimu ba iha setór edukasaun, saúde no agrikultura, nune’e neineik ba beibeik bele garante katak Timor-Leste sei dezenvolvidu iha futuru,” nia katak.
Jornalista : Osória Marques
Editora : Julia Chatarina
