DILI, 19 agostu 2024 (TATOLI) – Ministru Justisa (MJ), Sergio Hornai, hateten mákina imprensaun rua ne’ebé Governu halo akizisaun iha Filandia to’o ona Timor- Leste.
“Informasaun ikus ne’ebé ha’u simu katak mákina rua ba imprensaun passaporte ne’ebé antes ne’e ita kontrata Empreza Thales hodi halo akizisaun iha Filándia to’o ona Timor-Leste. Iha tempu badak nia laran, ha’u-nia dirijente neste kazu Diretór Jerál Notariadu sei kontantu imi via telefone tantu via watshapp hodi imi ba observa direta ita-nia mákina ne’e”, Sergio Hornai hateten ba jornalista sira hafoin halo aprezentasaun orsamentu Ministériu Justisa nian iha Komisaun Revizun Orsamentu Polítika (KROP) iha Ministériu Finansa Aitarak-Laran, segunda ne’e.
Ministru agradese ba ekipa tékniku Ministériu Justisa nian ne’ebé esforsu hodi akomapañia mákina ne’e.
“Agradese tebes, ohin buat hotu bele lao di’ak. Ha’u espera mákina rua ne’e bele asegura ita-nia kontinuidade funsionamentu liuliu ba imprime passaporte ne’ebé ita hotu nia hakarak”, nia revela.
Hornai hateten, mákina rua ba imprensaun passaporte ne’e husi empreza Thales akompaña husi ekipa tékniku Ministériu Justisa, Diresaun Nasionál Notariadu sei halo instalasaun ba sistema iha Notariadu molok mákina rua ne’e hala’o nia funsionamentu diáriu.
Rekorda fali katak Governu prevee millaun $2 hodi kontrata Empreza Thales iha Sigapura atu halo akizisaun ba mákina produsaun ba passaporte rua iha Filándia hodi bele fasilita liután servisu notaridu ba atedimentu públiku iha passaporte nian.
Jornalista: Natalino Costa
Editór : Zezito Silva
