Ministériu Justisa kompromete, tinan ne’e, rekruta Guarda Prizionál 100
DILI, 19 agostu 2024 (TATOLI) – Ministru Justisa (MJ), Sergio Hornai, hateten Ministériu Justisa, tinan ne’e, kompromete halo rekrutamentu ba Guarda Prizionál hamutuk 100.
Ministru simu ona informasaun husi Diretór Estabelesimentu Prizionál Becora, Emera no Suai katak iha Guarda Prizionál na’in-100 mak tama sei tama iha lista reforma.
“Sim, ha’u iha ona informasaun katak, ita-nia Guarda Prizionál 100 mak tama iha lista reforma, ida-ne’e mak ha’u hateten katak Ministériu Justisa sei haree bainhira maka sira atu pasa lolos ba reforma. Entaun ita iha ona hanoin ida katak tinan ne’e hakarak ka lakohi ita sei halo rekrutamentu ba Guarda Prizioneiru por volta ema 100 atu bele subtitui fali sira ne’ebé tama ona idade reforma”, Sergio Hornai hateten ba jornalista sira hafoin halo aprezentasaun orsamentu Ministériu Justisa iha Komisaun Revizun Orsamentu Polítika (KROP) iha Ministériu Finansa Aitarak-Laran, segunda ne’e.
Hornai dehan, Ministériu Justisa, fulan ida-ne’e, sei konsentra iha diskusaun orsamentu no posibilidade ministériu sei loke vaga hodi halo rekrutamentu.
“Ita presiza halo rekrutamentu ne’ebé lalais, para kuandu sira ne’ebé agora daudaun naran tama ona ba lista reforma, sira pasa duni ba reforma, entaun ita koloka kedan sira ida foun ne’e ba hodi ita garante funsionamentu servisu estabesimentu prizionál sira ne’ebé ita iha ne’e. Maibé kuandu ita lahalo rekrutamentu lalais, mak sira ida agora pasa ba reforma entaun fó afeta ba servisu estabelesimentu prizionál”, nia konklui.
Jornalista: Natalino Costa
Editór : Zezito Silva
