Ministériu Justisa propoin orsamentu adisionál millaun $10 iha OJE 2025

DILI, 19 agostu 2024 (TATOLI) – Ministru Justisa (MJ), Sergio Hornai, dehan Ministériu Justisa propoin orsamentu adisionál millaun $10 iha Orsamentu Jerál Estadu (OJE) 2025.
“Ministériu Justisa hetan tetu orsamentu ba tinan 2025 iha millaun $10-resin, maibé iha diskusaun ohin ami mós propoin adisionál millaun $10 tán”, Sergio Hornai hateten ba jornalista sira hafoin aprezenta orsamentu Ministériu Justisa ba Komisaun Revizun Orsamentu Polítika (KROP) iha Ministériu Finansa Aitarak-Laran, segunda ne’e.
Nia dehan, Ministériu Justisa hanesan ministériu ida ne’ebé bo’ot, tanba ne’e presiza iha orsamentu ne’ebé adisionál atu bele sustenta institusaun no bele sustenta ba programa sira ne’ebé planeia ona iha tinan oin.
“Programa Ministériu Justisa ba tinan oin mak primeiru, oinsá ita atu hatur no hametin liután funsionamentu institituisaun. Segundu mak hametin no reforsa rekursu umanu hodi garante asesu justisa ba ema hotu inklui servisu terras no propriedade nian. Ita bo’ot sira hatene, ita koalia kona-ba reforma justisa, ita presiza iha kapasidade ida adekudu, metin no konsolidadu”, nia adianta.
Governante ne’e dehan, Timor-Leste hanesan nasaun soberanu, presiza hametin kualidade rekursu umanu atu bele hatan ba dezafiu iha rai laran no mós mundu ohin loron nian.
“Foin daudaun ita bo’ot sira haree, husi Komisaun Reforma Justisa halo ona rekrutamentu dahuluk ba bolsa estudu ba setór justisa. Entaun ho orsamentu ne’ebé mak ohin ita proproin adisionál ne’e, ita atu reforsa programa sira ne’e ba longu prazu”, nia informa.
Ministru hateten, instituisaun tutelada hanesan Polísi Sientífika Investigasaun Kriminál iha tetu orsamentu hamutuk $800.000 maibé sira mós husu tán adisionál millaun $1 inklui Defensór Públiku iha tetu inísiu hamutuk $800.000 maibé iha aprezentasaun Komite Revizaun Orsamentu husu tán millaun $1.
“Ita bo’ot sira hatene PCIC no Defensór Públiku ne’e nudar institituisaun tutela iha Ministériu Justisa, maibé instituisaun sira ne’e iha ona autonomia finanseira atu nune’e sira bele jera sira nia osan mesak hodi responde ba kestaun sira ne’ebé mak importante,” nia konklui.
Jornalista: Natalino Costa
Editór : Zezito Silva

