BAUCAU, 19 agostu 2024 (TATOLI) – Komandi Polísia Nasionál Timor-Leste (PNTL) munisípiu Baucau husu komunidade kontribui estabilidade seguransa ba dezenvolvimentu iha munsípiu Baucau.
Komadante PNTL munsípiu Baucau, Superintendente Xefe Antoninho Mauluta, relata asuntu ne’e relasiona ho grupu balun ne’ebé mobiliza masa atu halo asaun impedimentu ba prosesu konstrusaun irrigasaun Galata iha postu Venilale no konstrusaun edifísiu Institutu Katólika Formasaun Profesór (ICFP, sigla portugés) iha suku Triloka, postu Baucau Vila.
“Ita grupu UNISMA mak foin lalais halo asaun balun hodi impede tanba konsidera ilegál, maibé ita bolu halo diálogu,” Komadante PNTL Munisípiu Baucau hateten iha Vila Nova, segunda ne’e.
Superintendente Xefe Mauluta, bainhira iha dezentendimentu teniente halo koordenasaun ho Autoridade Administrasaun Munisipál, Terra no Propriedade inklui bele kontinua ba Ministériu Públiku hodi la’o tuir dalan legál.
Komandu PNTL kompromente asegura estabilidade no seguransa ba prosesu dezenvolvimentu tomak iha rejionál Baucau liuliu relasiona ho planu programa Governu ne’ebé trasa ona.
“Bainhira mosu asaun direita iha terrenu, ita parte seguransa mós sei halo atuasaun direita,” Superintendente Xefe Mauluta akresenta.
PNTL Baucau rasik liuhosi despaxu Komandante sei la autoriza kualkér grupu ruma atu halo asaun pasífika mesmu iha pedidu koñesementu tanba oras ne’e sei konsentra ba prosesu preparasaun vizita Papa Francisco mai Timor-Leste.
Jornalista : Natalino Belo
Editór : Evaristo Soares Martins
