BAUCAU, 19 agostu 2024 (TATOLI) – Komandu Polísia Nasionál Timor-Leste (PNTL) munisípiu Baucau kontinua buka tuir motivu kazu tara-aan iha suku Umo-Ana-Ulo, postu administrativu Venilale munísipiu Baucau.
Komandante PNTL Munisípiu Baucau, Superintendente Xefe Antoninho Mauluta, esplika, kazu tara-aan ne’e rezulta vitíma inisiál AMS, sexu feto ho idade 20 lakon vida iha área Benduku, suku Umo-Ana-Ulo purvolta oras 15:00, iha loron-sábadu, 17 fulan-agostu.
“Motivu ita seidauk hatene, maibé prosesu investigasaun la’o hela,” Komandante PNTL Munisípiu Baucau Superintendente Xefe hateten iha Vila Nova, segunda ne’e.
Vítima hakotu vida liuhusi tara-aan bainhira família uma-laran partisipa serimónia kultura sau-hare iha uma-lisan, Uaibobo no vitíma nia isin-mate hetan husi sasin ho naran Sebastião bainhira tuir dalan atu kesi karau.
Sasin Sebastião rasik hafoin haree situsaun referida hato’o kedas informasaun ba parte família no seguransa Polísia Eskuadra Postu Venilale nune’e kontinua hatún vítima husi ai-leten.
Família vítima la autoriza atu halo autópsia no deside haloot tuir kultura.
Jornalista : Natalino Belo
Editór : Evaristo Soares Martins
