Estudante australianu na’in-rua buka fundu angariasaun hodi ajuda eskola

DILI, 20 agostu 2024 (TATOLI)–Estudante australianu voluntáriu na’in-rua ho apoiu husi ekipa husi Austrália, ho inisiativa hala’o atividade siklista iha Austrália, ho objetivu atu buka fundu angariasaun hodi halo konstrusaun ba saladeaula no fasilidade eskola iha Timor-Leste.

Estudante na’in-rua ne’e mak hanesan mak Leo Norman no Cezary Carmichael, ne’ebé sira ho ekipa tau hamutuk fundu angariasaun ne’ebé rekolla ona husi projetu siklista ho organizasaun ‘Spend it well’ hodi halo konstrusaun saladeaula iha eskola ensinu báziku ida iha postu administrativu Balibo, munisípiu Bobonaro.

“Projetu ida-ne’e estrañu oituan, ho bisikleta haleu Austrália no tuir dalan ami buka manu sira ne’ebé iha dalan hodi rekolla fundu husi projetu ne’e atu fó apoiu ba Timor-Leste ida-ne’ebé besik liu Austrália. Espera bele apoiu projetu ‘Spend it well’ hodi hadi’a oportunidade asesu ba edukasaun iha komunidade,” Estudante australianu, Leo Norma, hateten iha salaun konferénsia imprensa Ministériu Edukasaun (ME), Vila Verde, tersa ne’e.

Notísia relevante : Timor Furak-CDITL sei realiza feira no konsertu angariasaun fundu

Estudante ne’e dehan, projetu ne’e tuir dalan haree natureza sira, liu-liu manu hodi halo dokumentasaun nomós ko’alia ho komunidade iha Austrália kona-ba Timor-Leste, liu-liu kona-ba edukasaun, nune’e parte husi projetu ne’ebé halo mak atu rekolla fundu angariasaun.

“Impaktu ne’ebé hanoin atu fó ba Timor, ida-ne’e kapás tebes tanba konsege rekolla fundu angariasaun besik AU$60.000 no orsamentu ida-ne’e bele fó influénsia ba nesesidade edukasaun ba labarik sira iha futuru,” Leo Norma, akresenta.

Jornalista     : Osória Marques

Editora         : Julia Chatarina