DILI, 20 agostu 2024 (TATOLI)–Xefe Departamentu Transporte iha Autoridade Munispiu Dili (AMD), Tomás Alberto Bras, hateten fatin estasionamentu iha Rua Jacinto to’o Kuluhun ne’e husik mamuk tanba menus ajente kobransa hodi husu kontribuisaun ba sidadaun sira-ne’ebé para karreta-motor iha fatin estasionamentu sira-ne’e.
Nia hateten, fatin estasionamentu hanesan iha Ministériu Administrasaun Estatál nian ne’e la koloka ema iha ne’ebá, tanba funsionáriu públiku sira-ne’ebé para karreta no motor la fó kontribuisaun hodi selu taxa, entaun fatin ne’e husik mamuk.
“Ami-nia ema la to’o, entaun iha Loja Jacinto nian ne’e, daudaun ne’e ita husik mamuk. Ministériu Administrasaun Estatál nian ne’e, tanba sira la selu entaun ami tau prioridade mak fatin movimentadu sira-ne’e de’it,” Xefe Departamentu Transporte iha Autoridade Munispiu Dili (AMD), Tomás Alberto Bras, hateten ba Agência Tatoli, iha Caicoli.
Iha Ministériu Administrasaun Estatál nia oin ne’e, funsionáriu públiku sira-nia karreta mak para iha ne’ebá no la konstribui hodi selu, entaun Autoridade Munisipiu Dili orienta sira ba halo kobransa iha estasionamentu sira seluk.
Iha ajente kobransa taxa ba transporte públiku sira-ne’e hamutuk 33 iha fatin estasionamentu sira iha kapital hanesan iha merkadu Taibesi, Avenida 20 de Maiu, Avenida Liberadade Imprensa, Rua 25 Abril no Jardin 5 de Maio.
Kobransa taxa ba iha fatin estasionamentu sira-ne’e, daudaun la’o hela iha terrenu no populasaun ne’ebé iha karreta ne’e barak mak kontribui selu taxa estasionamentu.
“Ema-ne’ebé ba para sira-nia motor no karreta iha estasionamentu ne’e, sira selu taxa estasionamentu. Sira selu entre sentavu 0,10 no sentavu 0,25,” nia dehan.
Jornalista : Jesuína Xavier
Editór : Cancio Ximenes
