DILI, 20 agostu 2024 (TATOLI) – Prokuradór Jerál Repúblika (PGR), Alfonso Lopez, hateten Ministériu Públiku delega hikas kazu rezidénsia Fulolo inklui Ró Haksolok ba Komisaun Anti-Korrupasaun (CAC, sigla portugés) atu mantein investigasaun.
“Sim, kazu sira ne’e, Ministériu Públiku delega fila fali ona ba CAC atu kontinua halo prosesu investigasaun”, Alfonso Lopez, dehan ba jornalista sira iha Kuatel Jenerál F-FDTL Fatuhada, tersa, ohin.
Nia relembra, Komisaun Anti-Korrupasaun halo ona investigasaun no submete ona kazu ne’e ba Ministériu Públiku no halo ona análize, maibé presiza haklean tan investigasaun.
“Ami halo ona análize no gora ami delega fila fali kazu sira ne’e atu CAC bele haree fila hodi kontinua halo investigasaun”, nia adianta.
Alfonso rekoñese katak CAC seidauk iha Komisáriu tanba ne’e, Ministerii Públiku delega fali kompeténsia ba Polísia Sientífika Investigasaun Kriminál (PCIC, sigla portagés) atu atende kazu korrupasaun sira.
“Sim, Ministériu Públiku mós fó kompeténsia ba PCIC atu atende kazu korrupasan balun. Tanba ita bo’ot sira hatene foin daudaun ne’e CAC laiha Komisáriu. Maibé depois CAC iha fali ninia Komisáriu ami delega fali kazu balun ba CAC atu atende fali”, nia informa.
Hatan ba kazu Fulolo no Ró Haksolok, Komisáriu CAC Rui Pereira, labele fó komentáriu klean kona-ba asuntu ne’e, tanba kazu hirak ne’e hola parte ona iha segredu justisa.
Rekorda fali katak Uma ne’ebé lokaliza iha área Fulolo sai nudar rezidénsia Prezidente RAEOA maibé iha mandatu antigu Prezidente RAEOA Arsenio Paixão Bano deskofia faan ona ba Antigu Prezidente RAEOA Mari Alkatiri. Entaun rezidénsia ne’e sai problema no ikus mai komunidade sira hato’o keisa ba Ministériu Públiku .
Jornalista: Natalino Costa
Editór : Zezito Silva
